Shillong, Nailur 23
Ki runar bym lah ban tip ki dei kiei, ha kine khyndiat sngi ba la leit ki la ïoh ban kyndang ïa kawei ka dukan die marbam bad kumjuh ruh ban prong tuh ha ki lai tylli ki ïing ryngkat ban ïoh khung ei ka pisa da ki phew hajar lem bad tuh ïa ki marbam.
Katkum ka khubor kaba la ïoh lum na ki pulit la ong ba u Dipak Kumar Rai u la ujor sha ki pulit ba ha ka 15 tarik mynta u bnai, ki runar bym lah ban ithuh ki la kyndang ïa ka dukan ka jong u kaba don ha ïew Polo, Shillong bad ban tuh ïa ki mar bam bad kiwei kiba la kot sha ka T.8,900 eiei.
Ha kawei pat ka khubor na ki pulit la ong ba kawei ka longkmie ka la ujor ba ha ka step jong ka 20 tarik mynta u bnai, ki runar bym lah ban ithuh, ki la prong jubor ïa ka ïing jong ka kaba don ha Oakland, Shillong bad ban ïoh tuh ei ïa ka pisa kumba T.22,700.
Ha kawei pat ka khubor na ki pulit la ong ba ka Kong Aitonoris Lyngdoh Nonglait ka la ujor ba ha ka 19 tarik mynta u bnai, ki runar bym lah ban ithuh, ki la prong tuh ïa ka ïing jong ka kaba don ha Lawsohtun Block-II, Shillong bad ban tuh ïa kawei ka khadu ksiar bad kawei ka synduk buh pisa kaba don kumba T.2,000.
Kumjuh ruh na ka liang jong u Rajat Kanti Dhar u la ujor sha ki pulit ba ha ka 17 tarik mynta u bnai, ki runar bym lah ban ithuh ki dei kiei, ki la ïoh prong tuh ïa ka ïing sah jong u kaba don ha New Kench’s Trace, Shillong bad ban rah tuh ïa ka kawei ka kor Tablet, kawei ka camera bad kawei ka credit card kaba dei jong ka kurim jong u.
