Shillong, Nailur 26
Ka tnat ka koit ka khiah ka la pyntip ba ha kine ki 2 snem, ki la don 28 ngut kiba khlad namar ka jingshah dait ksew. Kumta na ka liang ka Myntri ka tnat ka koit ka khiah ka Kong Ampa-reen Lyngdoh ha ryngkat ki doktor ka la kyntu ïa ki nongshong shnong ban ym kheiñ sting haba shah dait ksew bad haba ki khyllung ki ïoh ka jingpang ‘ñiangpyrsit.
Haba kren sha ki lad pathai khubor ha ka Sngi Palei, ka Kong Ampa-reen ka la ïathuh ba ki la don ki jingjia shah dait ksew ha kaba don ruh ba duh ei ïa ka mynsiem briew. Ka la ong ba ym dei ban kheiñ sting hynrei dei ban leit ai tika ïada hadien ba la shah dait ha kino-kino ki ksew kam pher la ki dei ki ksew barit ne ki ksew kiba la shah injek ne ki ksew ba ri ha ïing.
Kham bun na ki jingjia shah dait ksew ki dei kiba shah dait ha ki ksew kiba shang makia khamtam ki ksew kiba shang surok.
Ki doktor ki la ïathuh ba ïa ka dawai tika la buh ha baroh ki jaka ai jingsumar naduh ki PHC ban ïada haba shah dait ksew bad ki paidbah kim dei ban kheiñ sting.
Ha kawei pat ka liang, ki doktor kiba peit ïa ka jingai tika ïa ki khyllung, ki la kyntu jur ïa ki kmie ki kpa ban nym kheiñ sting hynrei ki dei ban leit rah ïa ki khyllung ban ai tika ïada na ka jingpang ‘ñiangpyrsit (measles) namar haba ïoh ïa kane ka jingpang, ka ju don ka jingshit ha ki khyllung.
Ki la ong ba ki don ki kmie ki kpa kiba pyrkhat ba ym dei ban ai tika hynrei ban ap katto katne sngi ban lait miet bad koit hi na ka jingpang namar ka dei ka jingpang ‘ñiangblei, hynrei ka long kaba donkam eh ban ïoh ïa ka tika ïa ki khyllung khnang ba kan nym don ka jingma ïa ka koit ka khiah ki khyllung.
Ki doktor ki ïathuh ruh ba ki don ki khyllung kiba ïoh ïa ka tika ka banyngkong, katba ka tika ka ba-ar kim ïoh shuh namar ka don ka jinglehsting, da kaba kyntu ïa ki kmie ki kpa ban pyndep lut ïa ka tika ‘ñiangpyrsit.
Shuh shuh ki doktor ki la pyntip ba ka don kawei ka jingshitom kaba la suba ka dei ka jingpang polio kaba la lap ha Tikrikilla ha Rilum Garo bad ïa kane ym pat lah ban pyntikna haduh mynta namar dang ap ïa ka jingbishar bniah ki riewshemphang ha ka liang ka koit ka khiah.
