Jowai, Nailur 27
Da ka jingsngewbitar halor ka jingbym ïoh tulop ki nongtrei ka JHADC la bun-bun bnai mynta, u Organising Secretary ka VPP, u Bah Damewanhi Rymbai u la dawa ïa baroh ki MDC ka Jaiñtia Hills Autono-mous District Council (JHADC) ban hiar shuki noh namar kim lah ban kit ban bah ïa ka lyngkor ba la bynshet ha ki.
U Bah Rymbai u la pynpaw ïa kane ka jingdawa ha ka jingïalang ba la pynlong ha shwa ban pynwai noh ïa ka jingïakhih shnong kyllaiñ mungor ba la pynlong da ka Voice of the People Party (VPP) halor ka jingbym ïoh tulop jong ki nongtrei JHADC mynta la 9 bnai kynthih.
“Lada kim lah ban pyni ïa kata ka bor kaba la pynkup ha ki, ka bha ïa ki 29 ngut ki MDC bad uwei u MDC shu sieh ka JHADC ban hiar shuki noh bad artad ba ka por jinglong MDC jong ki ruh ka la kut noh,” ong u Bah Rymbai da kaba bynrap ba ïa ki kam ki jam jong ka JHADC dei ban aiti ha u DC u khlieh ka distrik na ka bynta ban pynïaid shakhmat.
Haba kynthoh ïa ki MDC ka JHADC, u Bah Rymbai u la ong, “Ngi kwah ba lashai la shisngi kin mih ki shithi ieh noh kam na ki MDC halor ka jingbym lah jong ki ban trei hok ïa ka kam.”
U Bah Rymbai u la siat pharshi ruh ïa u CEM bad ïa baroh ki MDC jong ka JHADC, da kaba ong, wat lada kim ïadonlang bynta lang ha kane ka jingïakhih hynrei ka kam jong ki ka pyni ba ki ïatreilang bad ka VPP da kaba ki khang tala ïa ka khyrdop kaba long kumba ki kyrshan ïa kane ka jingïakhih da kaba ki pep trei ruh mynta ka sngi.
Kane ka jingïakhih ka long tang ka jingsdang bad lada ka Sorkar kam sngap, kan pynbna da kiwei pat ki jingïakhih kiba tyngeh ban pynkohnguh ïa ka Sorkar ban siew dep ïa ka tulop jong ki nongtrei, la ong u Bah Dame.
Ha ka por mynstep shwa ba ki nongïalam bad dkhot ka VPP kin poi ha phyllaw JHADC, ïa ka khyrdop jong ka JHADC la khang tala bad la sakhi ruh ïa ki pulit kiba la pahara ïa ka ophis ka JHADC da kaba pynkhreh ruh ïa ki lyer pynsat khmat ïoh ba mih ka huri-hura.
Ha kane ka jingïakhih jong ka VPP, kiba bun ki nongtrei jong ka JHADC ruh ki la hap ban shong baroh shisngi shabar ka khyrdop namar ka jingkhang tala ïa ka khyrdop.
Namar ka jingbym ai lad ban pynlong ïa ka jingïakhih ha phyllaw JHADC, ki dkhot ka VPP ki la pynlong noh ïa ka jingïakhih hakhmat ka khyrdop JHADC da kaba rah lang ïa ki ‘Placard’ dawa pyllait pisa ïa ka JHADC.
U Bah Damewanhi Rymbai u la ïakren bad ka Secretary JHADC bad ban ai lad ïa ki ban rung shapoh ka phyllaw ban pynlong ïa ka jingïakhih kaba jai-jai da kaba ïathuh ruh ïa ka jingthmu jong ki ka long ban rah ïa ka sur ki nongtrei ka JHADC ki bym ïoh ïa ka hok jong ki.
“Kane ka dei ka ïing paidbah, kam dei ka ïing jong u CEM…ha ka jingshisha ki MDC ruh ki dei ban kmen ïa kane ka sienjam jong ka VPP namar kan pynmyntoi ïa ki hi”, la ong u Bah Rymbai.
