Shillong, Nailur 30
Ki runar kiba ym lah ban ithuh ki la ïoh ban tuh ïa ki tiar shet jingshet jong ka skul kaba don ha Oakland kaba la jia ha kane ka taïew ba la lah bad ruh ka jingshah tuh jong ki ar shaka na kylleng ki jaka.
Ha ka khubor kaba la ïoh na ki pulit la ong ba u Head Teacher jong ka Oakland Lower Primary School, Shillong la ujor sha ki pulit ba ha ka 26 tarik mynta u bnai ha ka por kumba 9 baje mynstep, ki runar ki bym lah ban ithuh, ki la tuh ïa ki tiar shet jingshet jong ka skul bad kiwei kiwei ki tiar, kiba shongdor kumba T.8,700/- na phyllaw jong ka skul.
Ha kawei pat ka jingjia, ka khubor na ki pulit ka la ïathuh ba u Kalnit G Momin u la ujor sha ki pulit ba ha ka 25 tarik mynta u bnai ha ka por kumba 2 baje dang step phyrngab, ki runar bym lah ban ithuh ki la tuh ïa ka arshaka ka jong u kaba don ïa u registration number ML05-U-2732 na ka shnong Chakodam ha North Garo Hills.
Shuh shuh ha kawei pat ka khubor, la ong ba u Dilip Sangma ruh u la ujor sha ki pulit ba ha ka 25 tarik mynta u bnai ha ka por kumba 4 baje dang step, ki runar bym lah ban ithuh ki la tuh ïa ka arshaka ka jong u kaba don ïa u registration number ML13-A-7209 na ka shnong Dandakol ha North Garo Hills.
La ong ba na ka liang jong u Happrol R Marak u la shu ujor tang da ka ktien ha thanad Kharkutta ba ha ka step jong ka 27 tarik mynta u bnai ha ka por kumba 2.30 eiei, ki runar bym lah ban ithuh ki la tuh ïa ka Bolero pick-up ka jong u kaba don ïa u registration number ML07-B-2428 na ka ïing sah ka jong u, kaba don ha ka shnong Menadoba ha North Garo Hills.
