Tang shu tip ba la jan lait teng ka pisa, ka VPP ka leh mynleh ïakhih ban pyni ba leh ma ki, ong u CEM ka JHADC

Shillong, Nailur 30

U Chief Executive Member (CEM) ka JHADC, Bah Thombor Shiwat, u la ong ba ka Executive Committee ka trei la ka kam bad pyndep ïa ka kamram ban ïoh teng ka pisa ban siew tulop ïa ki nongtrei ka Council, hynrei ka jingïakhih ki briew ka Voice of the People Party (VPP) ka dei tang ka jingïalehkai saiñ hima da kaba pyni sha ki paidbah ban ïakhih tang ban ïoh shim burom.

Haba kren sha ki lad pathai khubor ha ka Lah Sngi U Blei, u CEM u la ong kaei kaba paw ka long ba ka VPP ka buh da ki briew kiba ai jingtip halor ka jinglong jingman khamtam lada la jan urlong ka jingpyllait pisa ka Sorkar sha ki ADC.

“Kumta ha shwa ban lait ka pisa, ki briew ka VPP ki ju pynlong jingïakhih hadien ba ki la ïoh jingtip ba kan sa lait, bad ki pynlong ka jingïakhih ban pyni ka dei lyngba ka jingleh jong ki ba ka pisa ka lait ban siew tulop ïa ki nongtrei ka KHADC,” la kynthoh u Bah Shiwat.

U Bah Shiwat u la ong ba ka jingshisha ka long ba ka Executive Committee ka JHADC ka la ïai buddien bad ka Sorkar Jylla ba kan pyllait ïa ka pisa khnang ba ka JHADC kan lah ban siew tulop teng ïa ki nongtrei namar ka dang sahteng sa kumba 7 bnai.

Kumta u la ong ba ka jingïakhih ka VPP dang shen ha Jowai ka dei tang ka buit saiñ hima sima na ka bynta ilekshon MDC bad kine ki la ïakhih tang hadien ba ki la ïoh jingtip ba ka Sorkar Jylla kan sa pyllait noh teng ïa ka song pisa sha ka Council ban siew tulop ïa ki nongtrei.

U Bah Shiwat u la ong ruh ba ki MDC ruh ki khlem ïoh tulop bad kam lah ban long ba ki MDC kin ïoh tulop katba ki nongtrei kim ïoh.

Haba kylli sa katno ka pisa kaba dei ban siew tulop ka dang sahteng, u CEM u la ong ba ka JHADC ka donkam sa kumba T. 6 klur ban siew lut ïa ka tulop kaba 7 bnai jong baroh ki nongtrei.

U la bynrap ba lada ki ïakhih shisngi ne man ka sngi ruh, lada ka pisa ka don, kumno yn siew teng ïa ka tulop hynrei haba ka pisa ka don, ym donkam ban ïakhih ka VPP ne mano-mano namar ka Executive Committee ka khlem shongthait hynrei ka buddien ban ïoh ïa ka pisa ban siew teng ïa ka tulop ki nongtrei ka KHADC.

Shuh shuh u CEM ka KHADC u la ong ba ka VPP kam dei ka seng saiñ pyrthei hynrei ka dei hi tang kum kynja seng kumba long kiwei ki kynhun sengbhalang.