Shillong, Risaw 10
U Ratan Tata uba la shah sumar ha Mumbai kumba katto- katne por hapoh ka Intensive Care Unit (ICC) u la khlad noh na kane ka sla pyrthei ha ka por 12 baje mynmiet jong ka 9 tarik Risaw 2024.
U Ratan Tata ym tang ba u dei u hehspah hapoh ka Ri India bad ha kajuh ka por u chairman jong ka kompeni Tata kaba dei ka kompani shna kali bad pynmih ïa ki nar rod bad kiwei kiwei ki lad jingshakri ba ka la ai sha ki paidbah, hynrei u la dei ruh uwei na ki nongïarap ba radbah ïa ki briew kiba duk bad kiba donkam ïa ki jingïarap.
Kawei na ki bynta kaba kham sngewtynnad shuh shuh shaphang u Ratan Tata ba wat hapdeng ka jingbun kam ha ka jingim ban pynïaid kat ïa ka kompeni kaba heh duh ha ka Ri, hynrei u dang ai ïa ka por ban don bynta lang lyngba ka Tata Trusts ban pynlong ïa kawei na ki jingïakob ïalehkai phutbol jong ki khynnah rit lane ka Meghalaya Baby League.
Haba pynpaw paidbah ïa kane lyngba ka rynsan jong ka ‘Instagram’ ha ka 14 tarik jong u Naiwieng ha u snem 2019 kaba dei ka jingrakhe kyrpang ïa ka sngi jong ki khynnah lane ka Children’s Day, u Ratan u la ong ba kane ka League ka hikai bad ka sei ïa ki Messi ki Ronaldo bad ki Sunil Chetri jong ka lawei.
U Ratan u la ong ba u don ka jingkyrmen ba lyngba kane ka sienjam kaba la shim kan ïarap ïa ka kam ïalehkai phutbol hapoh India khamtam ba kan poi shaduh ki kyrdan kiba shalor.
Ïa ka Meghalaya Baby League la sdang ha u snem 2018 bad ka la bteng haduh u snem 2020.
