Shillong, Risaw 10
U Myntri Rangbah ka Jylla, u Conrad K. Sangma u la pynpaw ka jingsngewsih bad jingsngewdiaw halor ka jingkhlad noh u Ratan Naval Tata uba dei u Chairman ka Emeritus Tata Group bad u heh spah ba paw bha jong ka ri India.
U Sangma u la pynpaw ba ka jingkhlad noh u Tata ka long ka jingduh kaba khraw ïa ka ri namar ki kam ba bha jong u kiba u la noh synñiang sha ka ri baroh kawei bad ka jinglah jong u ban kyntiew ïa ka India ha ka liang ka ïoh ka kot.
U Myntri Rangbah u la kynmaw ruh ïa ka jingnoh synñiang u Tata lyngba ka ‘Tata Trust’ ha ka ban pynlong ïa ka ‘Meghalaya Baby League’ kaba la sdang ha u snem 2018, bad kaba la pynlong biang ha u snem 2019 bad 2020 ha shuwa ban pynthut noh ka khlam COVID-19.
Wat la u Tata u khlem wan hi da lade sha ka Jylla, hynrei u Sangma u la pynkynmaw ba u Tata u la ai ka jingkyrshan ba radbah ha ka ban pynïaid bad pynlong ïa kane ka lympung ïalehkai phutbol ki khyllung hapoh ka Jylla ha kito ki por.
Ha kajuh ka por, u la pynkynmaw ïa ka jingkyrshan jong u Tata ha ka por ba ka khlam COVID-19 ka la lynshop ïa ka ri da kaba phah ïa ki mar kiba donkam sha ki Jylla bapher-bapher.
Shuh shuh u la bynrap ba ka jingnoh synñiang u Tata ha ryngkat ka jinglong ba bha jong u, ka jingsbun, ka jingsngewrit bad ka jingjynsur mynsiem, ka la pynkylla ïa ka jingim jong ki briew bad ka long kaba eh ban don ki ban mih bujli ïa kum ma u.
