Jowai, Risaw 18
Ka National People’s Party (NPP) jong ka 2-Jowai Constituency ka la pdiang burom ïa ki dkhot kiba rung thymmai sha ka party ha ka jingïalang kaba la long ha District Library Auditorium Mynthong Jowai ha ka 15 tarik Risaw.
Ïa kine ki dkhot thymmai, la pdiang burom da u Myntri ka Sorkar Jylla bad MLA ka Jowai Bah Wailadmiki Shylla ha ka jingdonlang u District President NPP West Jaiñtia Bah Octomewot Lamin uba dei ruh u MDC shu sieh ha JHADC nalor kiwei kiwei.
U Bah Wailadmiki Shylla ha ka jingkren u la pynpaw ka jingsngewnguh bad ai khublei ïa baroh kiba la wan ban pynrung thymmai sha ka party, bad u la pynthikna ba ka jingwan rung ka jong ki kan ym long kaba sepei namar kin ïatreilang na ka bynta ban kyntiew ïa ka konstitwensi.
U Myntri u la ai nuksa ruh ïa ka party NPP kum ka hali ne jaka rep kaba donkam ïa ki nongïarap ki ban kit ban bah khnang ban lah ban rep kham bha bad ban ïoh kheit ïa u soh uba thiang na ka bynta ban pyndap pynbiang ïa ka konstitwensi hi baroh kawei.
Ha ka jingïalang u Myntri u la pyntip ba hapoh ka 2-Jowai Konstitwensi, 50% ki shnong dei kiba hap ha ki jaka sor ne Urban bad 50% sha ki thaiñ nongkyndong, hynrei na ka bynta ka roi ka par jong ka konstitwensi u la ong ba u la trei khlem noh shilliang ka tarajur.
Haba shim ïa ka kam nongmihkhmat kum ka jingshakri na ka bynta ka jingmyntoi ki paidbah, u Bah Wailadmiki u la ong, haba trei u peit ïa ka jingdonkam jong ka konstitwensi, bad um kheiñ mano ba sdang bad mano ba wanrah ïa ki projek.
U la pyntip ba ka 2-Jowai Konstitwensi ka dei kaba bun tam ki projek kiba sahteng, kiba shu sdang hynrei khlem lah ban pyndep, hynrei mynta ka dei pat ka konstitwensi kaba bun tam ki projek bad kaba lah bha ban pyndep ïa ki ha ka por kaba biang.
Shuh shuh u Bah Wailadmiki u la pynsngew ïa ki katto katne ki projek sahteng bad kiba lah ban pyndep hapoh ka 2-Jowai Konstitwensi bad kiwei ki kam pynroi kiba ka jingpyntrei ka dang ïaid shakhmat, kum ka Jowai Water Supply Scheme, ka Iawmusiang Shopping Complex, Mini Secretariat Jowai.
Ha ka liang ka koit ka khiah u la pyntip ba ka Sorkar kala mang ban kyntiew ïa ki jaka thiah ha Jowai Civil Hospital, khnang ba ki nongpang kin lait ban thiah ha baranda, bad wat ha ki lynti jong ka hospital.
Haba ïadei bad ki jaka ïalehkai, u la pyntip ba ka madan Kiang Nangbah Stadium ka jingpyntrei mynta kala ïaid shaid shaid ryngkat ka jingpynthymmai ïa u Artificial Turf kumjuh ka Athletic Track nalor kiwei kiwei ki jingpynmiat pynbha.
Haba ïadei bad ka pule puthi, u la pyntip ba la pynrung ïa ka Thomas Jones Synod College, Jowai hapoh ka People’s College ha kaba 24 ngut ki nonghikai la siew tulop da ka Sorkar.
Shuh shuh ban lait na ka jingkhapngiah ka sor Jowai, u MLA u la pyntip ba la dep ban shna ïa ka surok By-pass na Jingkieng Myntdu shaduh Lad kolej, nalor kiwei-kiwei ki kam pynroi sha sor bad nongkyndong.
