Mairang, Risaw 18
Ka tamasa ïa kaba la tip kum ka 2nd Markham Festival kaba ar sngi kala poi noh sha kaba kut da ka jingshongkun bad iphuh iphieng ha ryngkat ka jingwan ban sakhi lang da ki hajar ngut ki paidbah nongshong shnong na kylleng ki jaka jong ka district, ka Jylla bad nabar ka Jylla.
Lah ban kdew hangne ba ïa kane ka tamasa la pynïaid da ki bor pynïaid district jong ka Eastern West Khasi Hills District ha ryngkat ka jingïatreilang bad ka tnad Meghalaya Tourism bad la sdang ïa ka ha ka 16 tarik mynta u bnai bad pynkut noh ha ka 17 tarik ha kaba u Myntri Rangbah ka Jylla u Conrad K Sangma u la long u kongsan.
Kane ka tamasa ka la long shisha ka kabu ïa ki riew donsap ha kaba ki lah ban pyni ïa ki sap ki phong la ka long ha ka rwai ka siaw, ka put ka tem, ka shad ka phawar, ka shna jingshna ka pule Poitri bad kiwei kiwei kiba long tynrai.
Ha ka sngi pynkut u Myntri Rangbah u la wan ban iuh kjat ha kane ka tamasa kum u kongsan ban sakhi lang ïa ka jingitynnad ka mariang bad ban peit ïa ki prokram bapher bapher kaba la pynlong ha kane ka sngi, bad na ka liang u Myntri Rangbah u la ïoh ruh ka lad ban ïakynduh bad ïakren bad ki nongshong shnong jong ka thaiñ.
Haba kren ha kane ka sngi, u Myntri Rangbah u la ong ba kine ki jait tamasa ne ki prokram kim dei tang ki jingrakhe ban pynsngewbha, hynrei ki long ruh ka lad kaba biang ban pyni nam ïa ka spah mariang ka lad kamai jakpoh bad ka ban khring ruh ïa ki nongwan jngohkai pyrthei.
Shuh shuh u la ong, kine ki jait tamasa ki don la ka jong ka bynta kaba kongsan ha kaba pynmih ki lad kamai kajih bad ki kam ki jam ïa ki samla bad ki nongshong shnong ka thaiñ, ha ka ban pynroi lang ïa ka Ïew-ka-hat jong ki.
La pynkut ïa kane ka tamasa da ki jingïakop bapher bapher kiba kynthup ïa ka jingïakop Beauty Pageant ha Markham Valley bad ïa ka nam Mister Lumkyllang la rah da u Edmond Myrthong katba ïa ka nam Miss Wah Kynshi la rah da ka Evangel Diengngan.
Nangta, kiwei kiwei ki kynthup ïa ka Singing, Cultural Dance nangta ki Nongtem kiba paw ka jylla kynthup ïa ka band Blue Temptation, Thunders Cave, ki DJs bad kiwei.
Shuh shuh ha katei ka sngi la donlang ruh u MLA ka Mawthadraishan Constituency u Bah Shakliar Warjri, u MDC ka Mairang Bah Equator Nongrang, ka Deputy Commissioner EWKHD ka Kong Anita Kharpor, u SP ka District Bah GW Lyngdoh ki ADC bad kiwei ki ophisar Sorkar.
