Amlarem, Risaw 18
U Myntri ka tnad pule puthi ka Sorkar Jylla bad MLA ka Amlarem u Bah Lahkmen Rymbui u la pynbna jingïarap kaba 15 lak tyngka sha ka Riwar Jaiñtia Church of God Higher Secondary School kaba ha Ladjaplem, West Jaiñtia Hills District.
Ïa kane u Myntri u la pynbna haba pynhap pyrda ïa ka jinglehkmen jong ka jingdap 30 snem ne Pearl Jubilee jong ka skul kaba la seng ha u snem 1996 tang da ki arngut ki nonghikai bad 17 ngut ki khynnah skul bad mynta ka la kiew sha ka 22 ngut ki nonghikai bad 601 ngut ki khynnah skul.
Haba kren ha ka jingïalang u Bah Lahkmen Rymbui u la ai khublei ïa kane ka skul halor ka jingroi shaphrang ka jong ka.
Haba kren shaphang ka Community Integrated Skills Learning Programme, u Bah Lahkmen u la pynshlur ïa ki khynnah bad samla pule ban pynroi ïa ki sap ki phong kiba myntoi ïa ki shnong ki thaw bad ïa ka jingim jong ki bad kyntu ruh ba kim dei ban thew ïa ka jingjop tang da kaba ïoh kam Sorkar.
U Myntri u la wer ïa ki kmie ki kpa bad ki nonghikai ba kin ïarap ïa ki khynnah skul ban ithuh bad pynroi ïa ki sap jong ki. U la pynshlur ruh ïa ki samla pule ban trei shitom, bad ban pyndonkam ïa ki lad jingpule bapher-bapher.
U la ong ba ka jingkyrshan ïa ki khynnah skul ka dei ka jingkitkhlieh lang jong ki longïing, ki nonghikai, ka imlang sahlang bad ki bor pynïaid skul.
Nalor u Myntri la donlang ruh ka Veyotolu Kezo, IAS, Sub-Divisional Officer (Civil), Amlarem Sub-Division, ka Dr. Wa-I-Sa Sumer, District School Education Officer, West Jaiñtia Hills, ki kmie ki kpa, ki nonghikai, ki khynnah skul bad kiwei-kiwei.
Ha kane ka sngi la pyllait ruh ïa ka kot souvenir jong ka skul bad pynhiar ïa ka lama Pearl Jubilee bad la pynphuh pynphieng ïa ka jinglehkmen da ki jingrwai jingshad ba la shim bynta da ki khynnah kane ka skul.
