Jowai, Risaw 18
Ki jingjia thang khlaw ha East bad West Jaiñtia Hills ka la hiar ha u snem 2023-24, hynrei ka jingïada ïa ki khlaw bad ki jaka sah jong ki mrad khlaw ka dang long kaba kongsan ban tyngkai ïa ki jingthaw ba im, ong u CP Marak, Chairperson jong ka Meghalaya Lokayukta.
U CP Marak u la ïathuh ba ki jingjia thang khlaw ha East Jaiñtia Hills ki la hiar na ka 766 tylli ha u snem 2022-23 sha ka 348 tylli ha u snem 2023-24, katba ha West Jaiñtia Hills ki la hiar na ka 391 tylli sha ka 243 tylli ha kajuh ka por.
Ïa kane u CP Marak u la ong haba kren kum u kongsan ha ka jingïalang pynhap pyrda ïa ka Wildlife Week 2026 kaba long ha Kiang Nangbah Government College, Jowai ha ka 16 tarik Risaw.
La pynlong ïa ka jingrakhe da ka Divisional Forest Officer, West Jaiñtia Hills Division, Jowai halor ka phang “Connecting Habitats, Thriving Wildlife”.
U CP Marak u la kdew ïa ka jingshah pynthut jong ki jaka sah jong ki mrad khlaw bad ki jingjia thang khlaw kum ki jingeh kiba khraw. U la kyntu ïa ki paidbah ban long kiba phikir ha ka por ba rang, namar ki phlang ba tyrkhong bad ki tnad dieng ba hap ki lah ban pynsaphriang ïa ka ding.
U CP Marak u la ong ba kumba ar bynta na lai bynta jong ka East Jaiñtia Hills bad West Jaiñtia Hills ki dang don hapoh ka khlaw. U la ban jur ba ka jingïada ïa kine ki khlaw ka dei ka jingkitkhlieh lang jong ka tnad Forest bad ki paidbah.
Haba kren halor ka jingriewspah jong ka mariang, u la ong ba ka Narpuh Wildlife Sanctuary, kaba heh kumba 60 square kilometre, ka don palat 92 jait ki sim bad ki mrad, bad palat 199 jait thapbalieh. Ka thaiñ ka don ruh 28 tylli ki khlaw kiba la ïada kyrpang bad palat 1,200 tylli ki krem, kiba long ki jaka sah jong bun jait ki jingthaw ba im.
Ha kane ka jingïalang, la pynkup burom ïa ki briew kiba la noh synñiang ha ka kam pyllait im bad ai jingïada ïa ki mrad khlaw lyngba ka Wildlife Samaritan Awards.
La sam ruh ïa ki khusnam bad ki syrnod sha kiba jop ha ki jingïakop bapher-bapher.
Kiwei pat kiba ai jingkren ki long u Dr. P. Nongtdu, Director jong ka Jaiñtia Eastern College, Khliehriat bad Honorary Wildlife Warden jong ka East Jaiñtia Hills, u B. Dally Kharpran, General Secretary jong ka Meghalaya Adventurers Association; bad H.H. Mohrmen, Honorary Wildlife Warden jong ka West Jaiñtia Hills.
La pynïaid ïa ka jingïalang da u SP Lamare, Beat Forest Officer ba peit ïa ka Ratacherra Wildlife Beat, ka Kong N Laloo, IFS, Divisional Forest Officer jong ka Jaiñtia Hills, kaba la ai jingkren maitphang, katba u Range Forest Officer Umkiang bad Jowai Wildlife Ranges Bah S. Law u la ai ïa ka jingkren ai khublei.
