Shillong, Risaw 18
U Myntri Rangbah ka Jylla, u Conrad K. Sangma ha ka Sngi Saitjaiñ u la ong ba ka Sorkar ka buh hakhmat eh ïa ka pule-puthi namarba ka dei ka lad kaba khlaiñ bor tam ban wanrah ïa ka jingkylla ha ka imlang-sahlang.
Ïa kane u Myntri Rangbah u la kren ha ka jingrakhe ïa ka ’15th Foundation Day’ jong ka Mawkyllei College kaba la long ha Madan Dorbar Lyngdoh Nonglait, Eastern West Khasi Hills ha ryngkat ka jingdonlang u MLA ka Mawthadraishan, u Bah Shakliar Warjri kum u Symbud Kongsan.
Haba ai khublei ïa ka kolej, u Sangma u la ong, “Kane ka sngi ka long ruh ban ithuh ïa ki briew kiba la seng ïa ka kolej, ka imlang-sahlang kaba la pynneh-pynsah ïa ka, ki nonghikai kiba la kit ïa ka kam jingpule bad ki samla pule lem bad ki longïing kiba la buh ïa ka jingshaniah ha ka.”
U la ai burom ïa u nongseng, da kaba ong, “Ha kane ka sngi, nga ai burom bad sngewnguh ïa u (L) Hopingstone Lyngdoh, u nongseng bad nongsaiñdur ïa kane ka kolej bad u nongïalam ba khraw jong ka Jylla jong ngi,” haba pynkynmaw ïa ka jingïadei kaba ïajan hapdeng u (L) Hopingstone Lyngdoh bad u (L) P.A. Sangma lem bad ka ïing ka sem jong u.
Halor ka jingdonkam jong ka pule-puthi, u Sangma u la ong, “Ka dei ka bynta kaba kongsan tam ïa kano-kano ka Sorkar ha kaba khlem kane, ka imlang-sahlang ne ka ri bad ka jaidbynriew kan ym lah ban kiew shaphrang ha ka rukom kaba la angnud.”
“Ka pule-puthi ka dei ka lynti kaba khlaiñ bor tam ban wanrah ïa ka jingkylla ha ka imlang-sahlang. Na ka bynta jong ngi kum ka Sorkar, ka pule-puthi ka la long kaba hakhmat eh,” u la ong.
Haba pynpaw ïa ki jingkylla naduh u snem 2018, u Myntri Rangbah u la ong ba kane ka tnad ka la ïohi ïa ka jingmang pisa kaba kham heh, ka jingmanbha ha ka jingdon kiba ‘Pass’ha ki eksamin jong ka ‘Board’, ka kyrdan ba kham bha ha ka PGI, ka jingseng ïa ki kolej thymmai bad ki shlem pule ba shalor, bad ka jingpynbha bad jingtei ïa ki ïingskul thymmai.
“Ka pule-puthi ka la sakhi ïa ka jingkylla bad ngi ïaid ha ka lynti kaba dei, hynrei ka jingïaid lynti jong ngi ka dang jngai ban pyndep bad dang don shibun kiei-kiei kiba ngi hap ban leh ha kane ka tnad,” u la bynrap.
U Sangma u la ong ruh ba ka pule-puthi kam dei ka tnad kaba suk bad u la pan ïa ka jingïatreilang na baroh ki nongshim bynta ban ïatreilang. U la ong ba ka Sorkar ka dang pyrshang ban pynbiang ïa ki lad jingpule kiba kham shalor wat ha ki jaka nongkyndong bad ka dang trei ruh halor ka polisi ban kyrshan ïa ki skul bad ki kolej kiba leh bha.
Haba pynbna ïa ki jingai jingïarap na ka bynta kane ka kolej, u Myntri Rangbah ka Jylla u la mang T.25 lak na ka ‘Chief Minister’s Special Grant’ sha ka kolej bad sa T.5 lak sha ki samla pule na ka bynta ki tiar tem bad ki tiar ïalehkai.
Shuh shuh u la pynkut da kaba ong, “Kine ki 15 snem ba la dep ki la pynïar ïa ka lad ban ïoh bynta ïa ki jingpule kiba kham shalor bad ki la buh ruh ïa ka nongrim kaba skhem ha ka imlang-sahlang. Ka bynta kaba bud ka dei ban tei halor kane ka jingkiew da kaba pynkhlaiñ ïa ka jinglong-jingman ha ka jingpule, ban btin lynti ïa ki samla pule ha ka rukom kaba kham bha bad ban pynkhreh ïa ki na ka bynta ki jingpule kiba kham shalor, ka kam ka jam bad ka jingshakri ïa ka imlang-sahlang.”
