Shillong, Risaw 10
Ki nongïalam ka Megha-laya SSA School Associa-tion (MSSASA) ha ka Sngi Palei ki la leit ban ïakynduh ïa ki nongïalam ka All Meghalaya SSA School Teachers Associa-tion (AMSSASTA) ban ïakren sngewthuh halor ki mat jingdawa ba ïadei bad ki nonghikai SSA hapoh ka Jylla.
“Ka jingthmu kaba ngi wan shane ka long ba ngin ïakren sngewthuh bad ki ban ïatreilang haba ïadei bad kine ki mat jingdawa na bynta ka jingmyntoi ki nonghikai SSA,” ong u President ka MSSASA, Bah Aristotle Rymbai haba kren sha ki lad pathai khubor hadien ka jingïakynduh bad ki nongïalam ka AMSSASTA ha Madan Malki.
U la ban biang ba ka jingwan jong ki ka long ban ïakren wat la u la kdew shai ba kam dei satia ka jingwan ai jingkyrshan, hynrei ban ïakren sngewthuh khnang ba kin ym mih ar kynhun haba ïadei bad ka mat jong ki nonghikai SSA.
“Ka jingwan jong ngi mynta ka sngi ban ïakynduh ïa ki nongïalam ka AMSSASTA ka long ban ïakren sngewthuh bad ki haba ïadei bad ki mat jingdawa jong ki nonghikai SSA,” la ban biang u Bah Rymbai.
U la ong ruh ba hadien katei ka jingïakynduh, la rai ba ïa kane ka mat ka seng (MSSASA) kan sa rah ha ka General Executive Committee (GEC) jong ka ïa kaba ka AMSSASTA ruh kan sa leh kumjuh.
U President u la ong ruh ba ka seng kan sa pyntip ïa ka rai kaba mih hadien ka jingïakynduh jong baroh arliang ha kine ki khyndiat sngi ban wan.
Haba kylli, u la ong, “Kum u nongïalam, ngi da kwah hi ba kan don tang kawei ka seng, hynrei ban pynbor beit ban don tang kawei, ngim lah ban leh kumta namar phi tip ba ka India ka dei ka ri synshar paidbah bad baroh ki don la ki jong ki hok…kino-kino ki kynhun ki lah ban thaw seng…lada dei ba ngi lah ban ïatylli lei-lei ka dei ka jingkmen ïa ngi.”
Ha kajuh ka por, u la pynsngew sha ki nongïalam ka AMSSASTA halor ka jingïaid lynti jong ka seng bad ka Sorkar haba ïadei bad ki ar tylli ki mat jingdawa jong ki nonghikai SSA.
Ha kawei ka liang, ki nongïalam ka AMSSASTA ki la pdiang sngewbha ïa ka jingwan ki nongïalam ka MSSASA bad pynpaw ba ïa ka mat kaba ka seng (MSSASA) ka la shim ha u 2022, na ka liang ka AMSSASATA ruh ka la ai ka jingkyrshan, hynrei haba phai pat sha kane ka kynti ba mynta, kan pyndep beit ïa ka jingïakhih kaba la sdang bad kaba la ïaid la 10 sngi mynta.
“Na bynta ka jingïatreilang, ngin ym lah hi ban ong ba ngin ïatreilang noh mynta-mynta naba ngi ruh ngin hap shim ïa ka rai jong ka GEC namar ngi don lang bad ki paralok Garo lem bad kiwei ki nonghikai ha kylleng ka Ri-Khasi. Ïa mynta hi, ngim lah ban ong eiei hynrei ngi pdiang sngewbha ïa ka jingwan jong ki,” ong u nongaibuit ka AMSSASTA, Bah Batista M. Lyngwa.
Haba kylli, u la ong ba na bynta ka bha ka miat jong ki nonghikai SSA ha ka Jylla baroh kawei, mano hi bym kwah ïatylli, hynrei ha kane ka kynti kaba mynta, ka seng kam pat lah ban ai kano-kano ka rai.
“Na ka liang jong ngi, ngin sa shong bad ngin pynkloi noh ïa kane namar ngi la ong sha ki nongïalam ka MSSASA ruh ba ngin sa pyntip sha ki,” u la ong.
