Shillong, Risaw 15
Ka Gambegre konstitwensi kaba ki paidbah kin sa jied MLA thymmai sa tang khyndiat sngi, ka don 32,254 ngut ki nongthep ‘vote’ ki ban leit sha ki jaka thep ha ka sngi thep ‘vote’, kata, ha ka 13 tarik Naiwieng, 2024.
Katkum ka jingkheiñ kaba la ai da ka ophis u Chief Electoral Officer (CEO) ka Jylla, la ong ba na ki 32,254 ngut ki nongthep, ka Gambegre konstitwensi ka don 16,331 ngut ki nongthep ‘vote’ shynrang bad 15,923 ki nongthep ‘vote’ kynthei.
Ki don 993 ngut ki nongthep ‘vote’ kiba dang khie samla, 64 ngut kiba la noh ka rta sha ka jinglong tymmen, bad 100 ngut kiba don jingduna dkhot met.
Ka Gambegre konstitwensi kaba hap ha West Garo Hills district bad kaba jngai tang kumba 23km na sor Tura, ka don 51 tylli ki jaka thep ‘vote’. Napdeng kine, 31 tylli ki jaka thep ‘vote’ ki dei kiba don jingma.
Kin don 2 tylli ki jaka thep ‘vote’ kiba tip kum ki Model Polling Station bad kawei ka jaka thep ‘vote’ ka ban sa pynïaid tang da ki kynthei ha ka sngi thep ‘vote’.
Haba kylli shaphang ki kor thep ‘vote’, u CEO u la ong ba ka jingpynbiang ïa ki kor thep ‘vote’ ka long; ki Balloting Unit ki don 110 tylli, ki Controlling Unit ki don 110 tylli bad ki VVPAT ki don 110 tylli. Ki don ruh ki kor thep ‘vote’ kiba la pynkhreh kum ka jingpynap lypa.
Haba kylli shaphang ka jingpynbiang ïa ki pulit pahara ha ki jaka thep ‘vote’, u CEO u la ong ba ka jingpynkhreh ïa ki pulit pahara ka la don lypa khnang ban pynlong ïa ka jingthep ‘vote’ kaba khuid kaba suba bad kaba ïaid beit ïaid ryntih hapdeng ka jinglong-jingman kaba suk kaba saiñ.
Ïa kane yn sa pyntip biang kham hadien ha kaba ïadei bad ka jingdonkam ïa ki pulit pahara khamtam ki pulit Central Armed Police Force (CAPF).
