Shillong, Risaw 15
Ka National People’s Party (NPP) West Khasi Hills District ka dang ap ïa ka jingïapynbeit hapdeng u Bah Bajop Pyngrope u MDC ba mynta bad u MLA barim ka Rambrai Konstitwensi Bah Kimfa Marbañiang na ka bynta ka tiket MDC ha Rambrai-Jyrngam Konstitwensi.
Haba ïoh ban ïakren bad u President ka NPP West Khasi Hills District, Bah Macmillan Byrsat uba dei u MLA barim ka Nongstoiñ Konstitwensi, u la ïathuh ba ha Nongstoiñ Konstitwensi ki don ar ngut kiba pan tiket hynrei ïa mynta ym pat lah ban rai namar u dang ap ïa u MLA Bah Gabriel Wahlang khnang ban ïoh ïa pynbeit lang.
U la pyntip ba ha Mawshynrut Konstitwensi yn ïakhun hi u MDC ba mynta Bah Gigur Myr-thong, katba ha Rambrai Jyrngam ka seng ka dang ap ïa ka jingïapynbeit hapdeng u Bah Bajop bad u Bah Kimfa.
Shuh shuh u la pyntip ha baroh lai tylli ki Konstitwensi ki la thikna beit ban pynïeng kyrtong hynrei ka rai ka shong beit ha ka State Election Committee.
