Shillong, Nailur 07
Ka jingkhih phaloh jong ka kam saiñpyrthei hapoh ka Jylla ka la wanrah ïa ka jingklumar jingmut hapdeng ki nongïalam jong ki seng saiñpyrthei bapher-bapher kiba don ha ka liang synshar khadar.
Kane ka jingkhih phaloh jong ka kam saiñpyrthei, ka la wan mih ruh hadien ba ki la saphriang sted ki khubor ba ki don ki MLA kumba 8 ne 9 ngut jong ka United Democratic Party (UDP) kiba la thmu ban leit pynïasoh noh bad ka Bharatiya Janata Party (BJP).
Dang ha kine ki sngi, ngi la ïohi ruh ki khubor ba na ka liang jong u MLA ka UDP na West Shillong u Bah Paul Lyngdoh uba long ruh uwei na ki nongïalam ka UDP uba la pynpaw ba ki la don ki MLA jong ka UDP kiba la don hapdeng ka jingïakren bad ka BJP.
Kumba ka long mynta, ki tyllong khubor ki la ïathuh ruh ba kine ki MLA ka UDP ki la buh ruh da ki kyndon hakhmat ki nongïalam ba halor ka BJP ba lada kin rung ba dei ban pynurlong ïa ki jingdawa kiba dei ki mat kiba kum ka Jylla ka la khmih lynti la slem.
Lah ban kdew ruh ba ka BJP ka lah ban buh jingdawa ban ïoh shuh shuh ki dkhot ha ka Kynhun Myntri, bad lah ruh ban mih ka jingkylli halor kawei na ki shuki Symbud Myntri Rangbah, kaba lah ban ai sha uwei na ki nongïalam ba thymmai kiba wan rung sha ka BJP.
Shuh shuh ka tyllong khubor ka la pynpaw ruh ba lada dei shisha ba kine ki MLA ka UDP kin pynïasoh noh ïalade bad ka BJP, hato kan pynlong ïa ka NPP kaba lamkhmat ïa ka Sorkar MDA-II ba kan hap ban duh noh ïa kawei ka shuki Symbud Myntri Rangbah.
Ka BJP ha ka thaiñ Shatei Lam Mihngi ka la pynpaw bunsien ïa ka jingthmu ban pynkhlaiñ ïa ka seng bad ban pynïar ïa ka jingtreikam jong ka. Kumta, lada kane ka jingïasoh jong ki MLA UDP ka urlong, ka lah ban pynkylla ïa ka dur jong ka BJP ha Meghalaya na ka seng kaba rit sha ka seng kaba don ka bor kaba kham heh hapoh ka sorkar synrop.
