Shillong, Nailur 07
Ka All Khasi Meghalaya Tourist Taxi Association (A KMTTA) ka la kren da kaba shai sha ka Sorkar Jylla ba haba ka khot sha ka jingïakren ka dei ruh ban pynurlong ïa ki mat jingdawa kiba ka Association ka la ïakhun naduh u snem 2023.
“Ngan kren da kaba shai ïa ka Sorkar kaba khot ïakren ba ka dei ban pynurlong ïa ki mat jingdawa jong ngi, lada ym lah 100% ruh 70% ka dei ban urlong” la ong u Bah Ricaldinus Dohling President ka AKMTTA.
U Bah Ricaldinus u la ïathuh ba ka Sorkar Jylla ka la pyntip sha ka Association ba ka jingïalang ban ïakren haba ïadei ki mat jingdawa jong ki nongñiah kali kamai kan long mynta ka 08 tarik u Nailur ha ka por 11 baje mynstep ha State Guest House ha kaba ki Myntri ka tnat Transport Meghalaya bad Assam kumjuh ki heh ophisar kin ïadonlang ha katei ka jingïakynduhlang.
Shuh-shuh u la pyntip ba namarba ka jingkhot ïakren ka Sorkar ka long kyrkieh, kan ym don shuh ka jingsangeh kamai ki kali kumba la pynbna ha ka sien ba la dep, hynrei u la khot la wer ïa ki para nongñiah kali Tourist kiba lah ban wan kin ïa wan ban synran lang ha kaba kin ïakynduh lang ha State Central Library, Shillong shuwa ban leit sha ka jingïalang bad ka Sorkar.
U Bah Ricaldinus u la kren shai sha ka Sorkar ba lada ka rai kaba mih na katei ka jingïakynduh kam long kaba seisoh lane kaba pynhun ïa ka Association, ki nongñiah kali kamai Tourist kin ym don por shuh ban ap ïa ka Sorkar, kin shim da kiwei de ki sienjam kiba kham tyngeh bad phah ka kyrwoh kaba shai sha ka Sorkar ba kan mat ïa ki jingïakhih kiba kham tyngeh.
Haba bynrap ïa kane ka jingdawa jong ka AKMTTA u Bah Kmenlang Khonglah President jong ka Synjuk ki Nongñiah Kali Sor bad Khapsor u la pynpaw ba lada ka Sorkar ka lah ban khang ïa ka jingwan rung sahuh ki kali kiba nabar kan long ka jingmyntoi ïa ki khun samla kiba kamai kali ba na ka Jylla. “Nga sngew ban kyrshan ïa kane ka jingdawa jong ka AKMTTA ban pynsangeh noh ka jingwan ki kali ba nabar tang ha khappud bad kane kan ailad ban ïoh kam ki briew kiba na ka Jylla” u la ong.
