Shillong, Nailur 07
U Vice President ka Ri, u C.P. Radhakrishnan ha ka Lah Sngi U Blei u la ong ba ki riti-dustur ka Meghalaya bad ki shlem treikam ha ki shnong ki thaw ki pyni ïa ka jinglong ba-ïar jong ka India bad ka jingkhlaiñ jong ka synshar paidbah.
U Radhakrishnan u la ong ïa kane haba buh mawnongrim ïa ki kam pynroi kiba shongdor palat T.1,042 klur na ka bynta ka Jylla.
U Vice President u la buh mawnongrim na ka bynta 5 tylli ki projek kiba shongdor T.1,010.95 klur bad plie ïa ka Maternity & Children’s Hospital ha Nongstoiñ ha ka jingïalang kaba la long ha Soso Tham Auditorium.
Ïa kane ka jingpdiang burom la pynlong da ka Sorkar Meghalaya.
Kine ki kynthup ïa ka – New Shillong Water Supply Scheme (Phase II) Part A kaba shongdor T.850.58 klur, ar tylli ki projek surok hapoh ka NESIDS, ka jaka sumar AYUSH kaba don 30 jingthiah ha Shillong Civil Hospital bad ka ‘Sub-Station’ 132/33 KV ha Mawkhanu hapoh ka ‘PM-DevINE’.
La plie ruh ïa ka Hospital Nongstoiñ kaba la tei ha ka jingmang pisa kaba T.31.05 klur hapoh ka NHM.
Haba batai ïa ka kum ka sngi kaba kongsan na ka bynta ka Meghalaya, u Vice-President u la ong, “Ngi la sdang shibun ki skhim thymmai na ka bynta ban kyntiew ïa ka Meghalaya. Palat T.1,000 klur tylli ki projek la sdang mynta ka sngi bad nga ngeit skhem ba kane kan wanrah ïa ka jingkylla kaba khraw ha ka roi ka par jong ka Meghalaya ha ki snem ban wan.”
Da kaba ai khublei ïa ka Jylla halor ka jingpdiang sngewbha, u la pyntikna ba un ïeng ha syndah bad ki paidbah ka Meghalaya ha ka jingïaid lynti jong ka ha ka roi ka par.
U Radhakrishnan u la ïaroh ïa ka jingitynnad ka mariang jong ka Meghalaya, ka pateng tynrai bad ka riti-dustur ai jait kmie, da kaba ong ba ki shlem treikam ba shit rhem ha ki shnong ki thaw ki pynpaw ïa ka jinglong ba-ïar bad ka nongrim synshar paidbah ka ri India.
Haba ban jur halor ka roi ka par kaba kynthup lang, u la ong, “Khnang ba ka jingthmu jong ka ‘Viksit Bharat’ kan urlong ha u snem 2047, man la ki Jylla, man la ki nongbah, man la ki shnong bad man la ki nongshong shnong ki dei ban long ki ‘Viksit’. Ïa kano-kano ka jingroi lah ban khot ka jingroi tang haba ka kynthup lang. Ym lah ban iehnoh ïa kawei ruh na ki kynhun ‘riewlum jong ngi.”
Haba pynïadei ïa ka jingpynïasoh bad ka roi ka par, u la ong, “Ka ‘Act East Policy’ jong u Myntri Rangbahduh jong ngi ka ithuh ïa ki lad pynïasoh kum ka ‘G’ na ka bynta ka jingroi ne ‘Growth’. Khlem ka jingpynïasoh, ym lah ban don kano-kano ka jingroi.”
U la kdew ba palat 46,000 km ki surok nongkyndong la shna ha ka Thaiñ Shatei Lam Mihngi ha kine ki 10 snem ba la dep hapoh ka PMGSY ha ka jinglut kaba palat T.47,000 klur, da kaba pynleit jingmut ban pynïasoh ïa ki shnong ba jngai sha ki jaka sor bad ki jaka sor sha ki nongbah.
U la ïaroh ruh ïa ka MoU ba ïadei bad ka jingkylla jong ka Jylla hapoh ka Jal Jeevan Mission 2.0.
Haba phai sha ki jingkieng-jri jong ka Meghalaya bad ki jingitynnad mariang jong ka Sohra bad Mawsynram, u la ong ba ka Jylla ka hikai ïa ka ri kumno ban ïa im lang bad ka mariang, bad dei ban pynneh-pynsah ïa ki sawdong-sawkun, ka lariti bad ki riti-dustur, ha ryngkat ban ïaid shakhmat bad ka roi ka par.
Na ka liang u Vice President u la ai khublei ruh ïa u Myntri Rangbah ka Jylla, u Conrad K. Sangma bad ka kynhun jong u na ka bynta ki sienjam kum ka prokram ‘Homestay’, ka ‘CM-Elevate’ bad ka ‘Green Meghalaya’.
Ha kane ka sngi la ïadonlang u Myntri Rangbah ka Jylla, u Conrad K. Sangma, ki Symbud Myntri Rangbah ka Jylla – Bah Prestone Tynsong bad Bah Sniawbhalang Dhar, u Myntri ka Sorkar Jylla, Bah Sanbor Shullai, Chief Secretary, u Shakil P. Ahammed bad kiwei-kiwei ki ‘riew pawkhmat.
