Shillong, Nailur 07
U Vice President ka Ri India, u C.P. Radhakrishnan ha ka Lah Sngi U Blei u la ong ba ka ‘Secularism’ haba phai sha India ka shong ha ka jingburom ba markylliang ïa ka jingngeit bad ka rukom mane jong baroh.
Haba ai jingkren ha ka jingpdiang sngewbha paidbah ha U Soso Tham Auditorium hadien ba la buh mawnongrim na ka bynta 5 tylli ki projek kiba shongdor T.1,010.95 klur, u Vice President u la sdang ïa ka jingkren jong u da ka jingduwai.
“Nga duwai ha U Trai Jisu Khrist ba un kyrkhu ïa ngi baroh mynta ka sngi,” u la ong.
Haba batai shaphang ka jingmut jong ka ‘Secularism’, u Radhakrishnan u la ong, “Ka ‘Secularism’ ka long shaphang ka jingburom ba markylliang ïa ka rukom mane Blei, ka jingburom ïa ka jingngeit ba mar kylliang bad ka kyrdan. U Blei u long beit uwei, hynrei baroh ki don la ka jong ka hok ban mane ha kano-kano ka rukom kaba ki kwah. Ngi dei ban ïa im lang, ngi dei ban burom markylliang ïa ka jingngeit jong baroh. Kata ka jingmut jong ka ‘Secularism’.”
U Radhakrishnan u la ong ba ka dei ka jingwan jngoh ba nyngkong eh jong u sha ka Jylla Meghalaya hadien ba u la long Vice-President bad u la pynpaw ïa ka jingkmen ban don hapdeng ka jinglong sbun bad jingsngewrit jong ki paidbah ka Jylla.
“Nga da ktah shisha ïa ka jingieid bad ka jingpdiang sngewbha kaba la ai sha nga. Nga ai khublei ïa ki paidbah bad ka Sorkar Meghalaya hapoh ka jingïalam jong u Myntri Rangbah ka Jylla, u Conrad K. Sangma,” u la ong.
Ha kajuh ka por, u la pyntikna ïa u Myntri Rangbah ka Jylla ba un ai ka jingkyrshan ba pura na ka bynta ka roi ka par jong ka Jylla.
Ka Meghalaya ka dei kaba la bna na ka bynta ka jingitynnad mariang jong ka, ka kolshor ba neh pateng-la-pateng bad ki shlem tynrai ba shitrhem jong ka, la ong u Vice President bad bynrap ba ki riti-dustur bariewspah jong ka ki pynpaw ïa ka jinglong ba-ïar jong ka India.
Nalor kane, u la ai jingïaroh ïa ka jingkiew jong ka Jylla ha ka koit ka khiah, ka pule-puthi bad ka jingpynkupbor ïa ki kynthei lyngba ki SHG bad ong ba u Myntri Rangbahduh u la buh ïa ka thong jong ka ‘Viksit Bharat’ ha u snem 2047.
