Nongstoiñ, Nailur 07
Ki nongïalam shnong ka Noapara ha ryngkat ki nongshong shnong lem bad ka jingïadonlang ruh u MLA ka thaiñ u RG Momin, u MDC Bah Lurshai Kharbani ha ka sngi Nyngkong jong ka taiew kila leit ban ïakynduh ïa u DSP ka WKHD ban ïakren halor ka jinglong jingman bad ka jingjia ha ka shnong Noapara.
U Bah Lurshai Kharbani, MDC ka Rambrai u la ong, ka jingïakynduh ka jong ki, ka dei beit bad ka jingjia kaba la jia ha ka shnong Noapara ba ki don ki briew napoh Assam kiba wan ban pynwit ïa ka shong suk shong saiñ jong ki briew na Noapara.
Ha ka jingshisha ka jingthmu ka long ban ïakynduh ïa u Superintendent of Police hynrei ba um shym la don, kumta la leit ban ïakren noh bad u DSP na ka bynta ban ïakren ban buh noh ïa ka ktem pulit kaba shipor hapoh ka shnong Noapara ban pynthikna ba ka shong suk shong saiñ jong ki paidbah khappud kan neh.
Halor kane ka bynta, u Bah Lurshai u la ong ruh ba kum u MDC ha ryngkat u MLA kin sa leit ruh ban ïakren bad u Myntri ka tnad Kam Pohïing ka Jylla.
U la ong ruh halor ka jingwan ki briew ka Assam, na ka liang ka Sorkar Jylla bad na ka liang ka tnad pulit kim tip bad kaei ka daw ba ki wan ruh kim ïathuh.
U la ong ruh ba hadien ba la ïoh jingtip na ki nongshong shnong ki ong ba ki wan ban pynbor ban leh ïa ka census hapoh ka Jylla Assam. “Na ka liang ka jong ngi hadien ka jingbthah na ka Deputy Commissioner ba ka shnong Noapara la ïoh ban leh census ha ka Jylla Meghalaya hynrei ka Assam mynta pat ym sngewthuh balei ka wan ban pynwit biang ïa ka census,” u la ong.
U la pynpaw ruh da kaba ong ba “Ym dei ban pynbor da mano re mano hynrei ka dei beit ka mon laitluid jong ki paidbah, haba ki paidbah jong ka Noapara ter ter ki shnong kiba sah ki paralok Garo ym dei shuh ban pynwit lane ban pynbor namar na ka liang ka Sorkar kala bthah ba ïa ka census dei ban leh beit da ka mon laitluid jong ki paidbah hynrei kaba sngewsih ha kato ka sngi ki briew na Assam ki wan khlem da ai jingtip wat ïa ka Deputy Commissioner ka West Khasi Hills ruh”.
U MDC u la ong, “Nga phah ïa ka khubor kaba shai sha ki briew ka Assam ba ym bit ban pynwit ïa ki briew jong ngi nangne shakhmat, ailad ïa ki briew jong ngi kin jied ïa la ki jong ki jingkwah”.
U MDC u la pynrem ruh ïa ka jingkren jong uwei u nongïalam ka Rabha Asong Autonomous Council uba la kynthoh ïa ki jaidbynriew Khasi bad Garo ba ki dei kiba buhai shnong hapoh Assam, ka bym ïahap satia bad nalor kata ka jingkam jong u ba ka shnong Kamphoduli kala hap ha Assam bad kam dei ka jaka ïakajia pud ban dang hap ïa pynbeit bad kane ka jingkren ka long kaba bakla, kumta u la ong ba um dei ban kren klumar khlem da tip ïa ki jingshisha.
