Shillong, Risaw 16
Ka jingshah prong tuh jong ki ïing bad ka jingshah tuh jong ki arshaka la ka long ha nongbah Shillong ne sha kiwei pat ki district jong ka jylla, ka ïai bteng na kawei ka sngi sha kawei pat, kaba la pynlong ruh ïa ki nongshong shnong ban don hapdeng ka jingsyier mynsiem haba ieh ïing ne pynïeng ïa ki arshaka bad ki kali.
Katkum ka khubor kaba la ïoh lum na ki pulit la ong ba ka Kong O Phyllut ka la ai ka jingujor ba ha ka janmiet jong ka 13 tarik mynta u bnai, ki runar bym lah ban ithuh ki la prong tuh ïa ka ïing jong ka bad ïa kawei ka ïing jong ka Kong I Phyllut kaba don ha shnong Nartiang ha West Jaiñtia Hills bad ban rah tuh ïa ka pisa kaba long T.20 hajar na ka ïing jong ki.
Ha kawei pat ka khubor na ki pulit la ong ba u Bah Michael Dkhar u la ai ka jingujor ba ha ka 11 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AA-3238 na ka phyllaw jong ka ophis Jio kaba don ha Madan Iewrynghep, Fire Brigade, Shillong.
Kumjuh ruh na ka liang jong u Bah Esisterfil Nongsiej ha ka jingujor kaba u la ai sha ki pulit, la ong ba ha ka por 7 baje mynstep jong ka 14 tarik mynta u bnai, u la lap ba ka arshaka ka jong u, kaba don ïa u registration number ML05-U-3294, ka la jah na ka jaka kaba u pynïeng ha shnong Sohpian ha West Khasi Hills.
Ha kaba ïadei bad kine ki jingujor, na ka liang jong ki pulit ki dang pynlong ïa ka jingtohkit ban lap dien ïa ki briew ba donkti bad ruh ïa ki jingshisha baroh.
