Shillong, Risaw 17
Ka National Institute of Technology (NIT) Meghalaya ka la pynbna paidbah ba shen kan sa pynkynriah noh ïa kane ka jaka pule na Bijni Complex, Laitumkhrah, Shillong sha ka thaiñ Sohra ha kaba ïa kane ka jingtei la dep ban tei haduh kumba 90%.
Haba kren sha ki lad pathai khubor ha ka Sngi Palei, u Pinakeswar Mahanta, Director and Professor of Mechanical Engineering, u la ïathuh ba ïa ki jinghikai bathymmai hapoh katei ka jaka pule kaba la khmih lynti ba yn sa pynkynriah noh ha u bnai Nohprah sha Sohra yn sdang ai jinghikai naduh ka 1 tarik u Rymphang 2025.
U la ïathuh ba kane ka jaka pule kaba thymmai ka kynthup ïa ki jaka pule, ki jaka sah kiba pule, ki jaka bam, ki jaka sah, ki jaka treikam, ki jaka test, ka jaka buh kot pdeng bad ka jaka IT kaba la tbit bha.
Shuh-shuh u la pyntip ruh ba kane ka jaka ai jinghikai kan sa pynlong ruh ïa ka Convocation kaba 11 jong ka National Institute of Technology Meghalaya ka ban long ha ka 19 tarik u Risaw 2024 ha State Convention Centre, Shillong ha kaba u kongsan ha katei ka sngi un dei u Prof. Avinash Kumae Agarwal, Director, Indian Institute of Technology Jodhpur bad u Maj Gen Rajesh Kumar Jha, AVSM (Retd), Director (Personnel), NEEPCO Ltd pat un long kum u Symbud Kongsan bad ïa kane ka convocation yn pynïaid da u Chairman ka Board of Governors ka NIT Meghalaya, u Sunil Alagh.
Ha kane ka Convocation, yn pynkup burom ïa ki 193 ngut ki riewstad bad ki samla pule, kiba kynthup ïa 140 ngut ki khynnah ka B. Tech, 9 ngut ki khynnah ka M. Tech, 23 ngut ki khynnah ka M.Sc bad 21 ngut ki PhD Scholar.
Yn ai khusnam da ki takma ksiar bad rupa na ka bynta ka jingtbit jong ki samla ha ka jingpule, bad ïa ka takma ksiar jong u President yn ai sha u nongpule uba tbit tam. Mynta u snem, da ka jingshimkhia jong u Chairman, u Sunil Alagh, la seng ïa ka takma ksiar Chairperson, bad yn ai ïa ka sha ka kynthei kaba la pyndep ïa ka kyrdan pule ba tbit tam (B.Tech).
Ha u snem 2024, kane ka jaka pule ka la wan ha ka kyrdan 68 ha ka kyrdan Engineering da ka NIRF, da kaba kiew da saw kyrdan na ka kyrdan kaba 72 ha u snem 2023. Ka NIT Meghalaya ka dei ruh kaba la buh kyrdan da ka Indian Institutional Ranking Framework (IIRF) ha ka kyrdan kaba 88 napdeng ki 170 tylli ki kolej hapoh ka Ri India ha u snem 2024.
Ha ka Expo-2024 ha u bnai Naitung, ka NIT Meghalaya ka la ïoh ïa ka khusnam banyngkong ha ka jinglah jong ka ban leh bha ha ka Higher Education.
U Mahanta u la ong ba kane ka jaka pule ka bud ïa ka rukom saiñ kam jong ka Jylla ban buh kyrpang ïa ki jaka shong jong ki trai jylla bad ka pynsuk ïa ka jinghikai ba bha na ka bynta ki riewlum jong ka Meghalaya.
“Kane ka jaka pule ka lah ban sngewsarong ban buh ïa ki samla pule jong ka ha ki kam kiba heh ka tulop ha ki seng bapher-bapher kum ka Microsoft, Amazon, Gap, Hindustan Petroleum, JP Morgan & Chase, bad Bharat Petroleum, ban jer tang katto katne. Ka jaka pule ka long kaba la pynbeit ha ka jinghikai, ka jingwad bniah bad ka jingai jingmut bad ka ïaleh shitom ban pynmih ïa ki lad ki lynti kiba ïarap ban pynurlong ïa ki jingangnud jong ki briew ha ka thaiñ”, ong u Mahanta.
Shuh-shuh u la ong ba kane ka jaka pule ka la pdiang ruh ïa phra tylli ki shnong, ha ka ban pynbha ïa ka jinglong-jingman jong ki nongshong-shnong lyngba ki jingthmu kum ka jingpynbiang ïa ki sharak sngi, ki kor pynkhuid um, ki tiar thoh skul, bad ka jaka kit um.
“Ngi la pynbiang ruh ïa ka skul Ramakrishna Mission ha Sohra da ka jingpynïasoh ‘internet’ kaba 50 Mbps ban kyntiew ïa ka jinghikai digital. Nalor kata, ka Centre jong ngi, ka kyrshan ruh ïa ki kynhun kiba shah ktah bad ka kyntiew ïa ka jinglah ban ïoh ïa ka jinghikai ha ka pule-dangle”, bynrap u Mahanta.
Kane ka jaka pule ka don ïa ki MOU bad ki katto-katne ki seng ha India bad shabar ri, bad dang shen, ki nonghikai na kane ka jaka pule ki la leit sha Vietnam bad Sharjah ban khring ïa ki samla pule bad ka jingïatreilang nabar ri bad mynta ki don 39 ngut ki samla pule nabar ri kiba pule ha NIT Meghalaya.
