Shillong, Risaw 29
Ka jingpynkhreh-jingpynkhrum ka Sorkar Jylla ban pynkhuid noh ïa ki nongdie madan na Khyndailad da kaba pynkynriah noh sha kawei pat ka jaka kan sa urlong noh ha shwa ban kut u Naiwieng mynta u snem.
Ha ka jingshisha, ka sorkar ka la pyrshang mynta la bun snem ban pynkhuid noh ïa ki nongdie madan na lynti Khyndaidad sha Umsohsun, namar ka la pynisih bad pynthut ïa ka ïaid ka ïeng jong ki briew bad ki kali khamtam ïa kiba wankai na shabar ka Jylla. Hynrei katba nang mih ki sngi, ki nongshong die madan ki la nang kharoi pynban, kaba la pynlong ïa katei ka jaka pdeng jong ka sor Shillong ka jaka ba khapngiah bad ba lymmuh-lymmaiñ bad kaba jaboh.
Haba kren bad ki lad pathai khubor hynne ka Sngi Ba-ar, u Myntri ba khmih ïa ka tnat Jngohkai, u Bah Paul Lyngdoh u la ong ba ha kane ka kynti ka sorkar kan leh da kaba tyngeh bad ka la dep ban pynbiang ïa ki jingdonkam baroh.
“Ki don kumba 200 ngut ki nongdie madan kiba la pynrung kyrteng ïa kiba yn sa pynkynriah noh sha lai tylli kiwei pat ki jaka, kine kin dei kito kiba la pynbiang ïa baroh ki jingdonkam katkum ka jingbthah ka Town Vending Committee bad ka SMB”, u la ong.
Katkum ka jingong u Myntri, hadien kane yn sa bud sa sha kiwei ki jaka ban pynkynriah ïa ki nongdie madan ba kynthup ka thaiñ Laitumkhrah, ka thaiñ Motphran bad Umsohsun.
U Bah Paul uba dei ruh u nongaiktien ka Sorkar u la ong ba ka tnat Pynroi Sor ka pyrshang ban wanrah ka jingburom lang ïa ka hok jong baroh kiba pyndonkam ïa ki jaka paidbah, kiba kynthup ïa ki nongkit nongbah, ki nongñiah kali, ki nongïaid lynti, kumta ki nongshong die madan kim dei ban knieh ïa ka hok jong ki nongñiah kali bad kiba ïaid lynti kumba ki la leh mynta.
Haba kylli halor ka jingnang ïai mih ki nongdie madan man la ka sngi, bad kumno ka Sorkar kan lah ban weng, u Bah Paul u la ong ba tang shu dep ban pynkynriah ïa kiba dei hok ha u Naiwieng, ka Sorkar kan pynbna ba ka lynti na Khyndailad sha Umsohsun ka dei ka lynti ïaid bad yn nym shah ïano-ïano ban shong dukan ha surok.
“Nga pynthikna hangne ba hadien u Naiwieng, ïa kito ki briew kiba dei hok ban ïoh jaka ngin pynkynriah lut, ïa kiba sah da lei-lei ngin nym ailad ba kin bteng ban shong die madan”, u la ong.
