Mawkyrwat, Risaw 30
Uwei u samla uba la tip kyrteng u Jimwilson Thongni ba dang 19 snem ka rta, khun jong ka Kong Ailinda Thongni na ka shnong Rangblang Pam-briew ha South West Khasi Hills District, u la duh ei noh ïa la ka jingim hadien ba la suba ba u la shah bat ha ka bording ilektrik hajan ka ïing sah jong u katba u dang leit khar soh ot na uwei u dieng.
Katkum ki tyllong khubor ba la ïohlum la ïathuh ba katei ka jingjia ka la jia ha ka step jong ka 30 tarik ha ka por kumba 8.30 eiei bad ïa utei u samla la lap da ki khynnah ba u la thiah lyngktar hajan u nar post ilektrik.
Ïa utei u samla la pynkit noh wut-wut sha Civil Hospital Nongstoiñ hynrei la ïathuh ba mar ïa poi ha katei ka jaka sumar utei u samla u la khlad noh.
Katkum ka jingïathuh u Bah Bokstone Thongni, Secretary shnong Rangblang u la ong ba utei u nar post uba don ha katei ka jaka u dei uba la ingkhong naduh na trai namar ka jinghap u sainar ding la kumba shi taïew eiei ha kaba wat ki mrad ki mreng kum ki khnai bad ki risang ki la ïap ei ha katei ka jaka.
Shuh shuh u la ong ruh ba ka shnong ka pynpaw ïa ka jingsngewsih kaba khraw halor ka jingduh noh ïa ka mynsiem ba kordor tang namar ka jingleh tori jong ka tnat MePDCL Mawkyrwat wat la ka shnong bunsien ka leit ban ujor halor ka jinghap ki sainar na ki post hynrei katei ka ophis kam shym la pynsngap satia.
Kumta ka shnong ka dawa na ka ophis ba ka dei ban leh eiei bad ka shnong kan sa phah jingthoh ruh sha ki bor bahalor bad ïa u Myntri ba dei ïa ka tnat bording ban maramot noh kloi ïa utei u nar post. Kumba long mynta ka shnong khamtam ki khynnah ki don hapdeng ka jingshong syier namar utei u nar post u don hajan u dieng soh ot uba ki khynnah barabor ki ju leit khar soh ot na utei u dieng.
