Shillong, Risaw 30
Ka jingshah ieh khunrei ki longkmie hapoh ka Jylla Meghalaya ka long kaba jur bha bad kiba bun ki kynthei ki mad ïa shibun ki jingeh bad ki jingshah ban beiñ ha ïing- ha sem ha ki kurim jong ki.
Haba ïoh ban ïakren bad ka Myntri ka Kong Ampareen Lyngdoh halor kane ka bynta, ka la ong ba ka jingshah ieh khunrei ki longkmie kam dei kaba ju jia tang ïa ki kynthei Khasi ne hapoh ka Jylla Meghalaya hynrei ki don shibun kiwei pat ki kynthei kiba ju shah ieh khunrei, bad ong ba kum ki kynthei ki dei ban shim ïa ka rai ba ki dei ban pynkitkhlieh ïa u shynrang haba u leh ïa kano-kano ka kam.
“Kam dei ka jingshisha ba tang ki kynthei Khasi kiba shah ieh ha u lok, nga tharai kiba bun ki kynthei kiba shah ieh lok bad nga tharai ngi dei ban shim ïa kawei ka rai ba kum ka jinglong kynthei, ngi dei ban pynkitkhlieh ïa ki shynrang lada ki leh ïa kino-kino ki kam”, ong ka Kong Ampareen.
Ka Myntri ka la ong ruh ba kum ki kynthei ki dei ban don ïa ka jingïatylli para maki bad kumba ka long mynta, ki la don shibun ki aiñ bapher-bapher ha kaba kino-kino ki shynrang ki pynarmet ïa ka kynthei, ki dei ban siew ïa ka baibam lym kumta kin ngat ha ki kyndon aiñ kiba tyngeh.
“Mynta ki la don ki aiñ bapher-bapher ba haba phi pynkha khun ïa kano-kano ka longkmie bad haba phi ieh khunrei ïa ka, phin hap ban siew ïa ka baibam bad ngin thwet ïaphi haduh ba phin da hap ban siew ïa ka bai bam”, ong ka Kong Ampareen.
Shuh-shuh ka la ong ba kum ki kynthei kim dei ban sngew rangli than ïalade namar ka jingmih ka huri-hura ha ka shongkha-shongman ka long ha satlak ka pyrthei hynrei ha ka jaidbynriew Khasi pat ka long ba u shynrang u hap ban wan shong-wan sah sha ïing ka kynthei, bad kane ka ju mih ka jingbym sngewthuh jingmut kaba pynpaw shabar.
“Hynrei kiba bun ki kynthei ki shah ban beiñ lada ki wan na kano-kano ka kynhun jaidbynriew ne kano-kano ka kynhun niam ruh, ki kynthei ki long ki nongshah shitom kiba sngap jar”, bynrap ka Kong Ampareen.
