Jowai, Naiwieng 01
Ki nongshong shnong ka Moodymmai, West Jaiñtia Hills District ki la kyntait mardor halor ka jingmih khubor ba ka Dorbar Shnong Moodymmai ka la rai ban kyrshan tylli ïa u MDC ba mynta, u Bah Jesse Suiam kum u kyrtong sha ka ilekshon MDC ka Jaiñtia Hills Autonomous District Council (JHADC).
Ki nongshong shnong ka Moodymmai ha ka 1 tarik Naiwieng ki la leit ïakynduh ïa u Acting Waheh Shnong ban pan jingpynshai halor katei ka rai.
U Acting Waheh Shnong, Bah Molsing Dkhar haba pynshai halor katei ka rai, u la ong ba u MDC Jesse Suiam ha ka 22 tarik Risaw u la phah shithi sha ka Dorbar Shnong bad kyrpad ban lum dorbar na ka bynta ban pynsngew paidbah ïa ki skhim pynroi ba u la wanrah hapoh ka shnong ka thaw.
Kumta ka Dorbar Shnong ruh ka la sngap ïa katei ka jingkyrpad jong u MDC bad ha ka step 30 tarik Risaw ka la lum ïa ka Dorbar Step Kyrpang tang na ka bynta ban pynsngew ïa ki skhim pynroi ym na ka bynta ban pynïeng kyrtong.
Ha katei ka dorbar kaba la long ha ka 30 tarik Risaw, la donlang ki dkhot ka EC shnong, katba u Waheh Shnong namar ba u don hapdeng ka jingpang, um lah ban ïashim bynta ha katei ka dorbar.
Hynrei u Waheh Shnong u la pynpaw pat ka jingsngewlyngngoh ba na ka liang u Chairman jong ka Dorbar Shnong Moodymmai, Bah Emris Ksoo hadien ba la wai ka jingïalang dorbar u la pynbna lyngba ki lad pathai khubor ba ka Dorbar Shnong Moodymmai ka la rai ban pynïeng biang ïa u Bah Jesse Suiam ha kane ka ilekshon MDC ka ban wan.
“Kane rai ka dei ka jingrai shongshit bad rai shimet jong u Chairman Shnong, ym ka rai jong ka Dorbar Shnong,” la pynshai u Bah Molsing Dkhar, da kaba pyntip ruh ba kat haduh mynta, ka Dorbar Shnong Moodymmmai kam pat pyrkhat satia ban kyrshan ne pynïeng ïa uno-uno u kyrtong namar ym pat tikna ba ka ileshon kan long lano.
“Hooid, ngim lah ban len ba u MDC u la pynshai hapoh ka dorbar ïa kita ki skhim pynroi ba u la wanrah hapoh ka shnong, hynrei kaba pynkyndit pat ïa ngi kum ki nongshong shnong ka dei halor ka jingpynmih rai jong u Chairman Shnong,” la ong uwei na ki nongshong shnong Bah Kaidor Shullai.
Hapoh ka dorbar, la pynsngew ïa ki skhim katba ka khubor pat sha ka pyrthei la pynsngew da kumwei, la ong u Bah Shullai bad bynrap ba kane ka long ka jingïuh roit ïa ka hok jong ki nongshong shnong.
Namar kata, u Bah Shullai u la kyntu ïa ka EC shnong ban bishar bha halor kane ka bynta khnang ban lait na kano-kano ka huri-hura hapoh shnong poh thaw.
