Tura, Naiwieng 04
Ka Achik Conscious Holistically Integrated Krima (ACHIK) ha ka Lah Sngi U Blei ka la dawa ba dei ban thung noh mardor ïa u Pro Vice Chancellor jong ka Tura Campus ka skulbah North Eastern Hill University (NEHU).
Ha ka shithi kaba ka la phah sha u Vice Chancellor ka NEHU, ka ACHIK ka la kdew ba ka jingdon jong u Pro Vice Chancellor ha kane ka Campus, kan ïarap shibun ban sei ïa ki nongïalam ka thaiñ bad kumjuh ruh ban lah shim rai kloi halor ki kam bad ki jingdonkam kiba kyrkieh jong ka Campus bad ruh ban lah tuklar ïa ki jingeh jong ki samla pule, ki academic program bad ruh ïa ki jingdonkam jong ki nonghikai.
Katkum ka jingpynpaw jong ka seng, ka jingdon ïa kum une u ophisar kan nang pynkhlaiñ ïa ka jingïadei jong ka imlang ka sahlang bad kumjuh ruh ban pynthikna ïa ka jingkiew jong ka campus namar kumba long mynta ka jingbym don Pro Vice Chancellor ha Tura Campus ka la wanrah ïa ka jingdkoh ha ka rukom trei ktah kaba la ktah ïa ki nonghikai bad ki samla pule.
