Shillong, Naiwieng 05
Ha ka jingïakhun na ka bynta ban ïoh ïa ka jingjop ha ka ilekshon President jong ka Ri United State hapdeng u Donald Trump na ka Republican bad ka Kamala Harris na ka Democrat, ka Moo Deng kaba dei ka khun mrad Hippo ka la jied ïa ka kyrteng u Donald Trump kum u nongjop. Katkum ka durkhih la sakhi ba ka Moo Deng, ka jait khun mrad kaba don ha Thailand, ka la shim ïa ka bynta kum nongïathuhlypa, ha shwa ka ilekshon ha United State mynta u snem 2024.
Kum ban shu pynkynmaw ba ka jingïakhun ha kane ka ilekshon hapoh ka Ri US ka la long hapdeng u Donald Trump bad ka Kamala Harris na ka bynta ka shuki President, ha kaba la sakhi ba kane ka khun hippotamus ka la jied ïa u nongjop bad uta u dei u Donald Trump.
Ïa kane ka khun hippo la khot ban mih napoh um da kaba ai ar tylli ki sohjew ba la thoh ïa ki kyrteng jong ki kyrtong halor jong ki bad la ïohi ba ka la ïaid beit-beit sha ka lyngkhot soh kaba la shna da kaba pyndonkam ïa ka snep sohjew ha kaba la buh ïa ka kyrteng jong u nongïalam jong ka Republican u Donald Trump. Ïa kane ka durkhih la ring ha Khao Kheow Open Zoo ha Si Racha, Thailand.
Ïa ka Moo Deng la kha ha u Jylliew 2024. Ka dei ruh ka jait mrad hippo kaba pawnam bha hapoh ka internet, namar ki jinglehkai jong ka. Kane ka khun mrad hippo kaba iskuiñ ka la paw bha hadien ba ki nongsumar jong ka ki la pynmih ïa ki durkhih jong ka ha ki rynsan TikTok bad Instagram na ka jaka ba ka sah. Dang shen ka Moo Deng ka la khring bad pynïapbiej ïa ki nongpeitkai lyngba ka jingshad ‘moonwalk’ kaba pynkynmaw ïa ka jingshad ba pawnam jong u nongrwai bad nongshad na ka Ri Amerika, u Michael Jackson.
