Shillong, Naiwieng 06
Ka Mawlai Block Congress Committee (MBCC) hapoh ka jingïalam jong u Bah Wanseng Jyrwa kum u President ka la leit ban noh jingïarap da ka song pisa bad ka tin sop ïing ïa ka Kong Phirda Kharthang-maw, kaba la duh noh ïa la ka ïing na ka jingshah bam duh ha ka ding.
Lah ban pynkynmaw ba ha ka 4 tarik mynta u bnai, ka ding kaba klang katta-katta ka la bam duh ïa kawei ka ïing kaba don ha ka shnong Nongkohlew, Dong Mission kaba hap hapoh ka Mawlai Konstitwensi, ha kaba baroh ki jingdon-jingem ki la ingkhong khait bad kylla dpei lut.
Kane ka dei ka ïing jong ka Kong Phirda Kharthangmaw bad u Bah Nishon Thabah, ha kaba ym don shuh wat tang kawei ka tiar kaba la lait hynrei ki thylliej ding kiba la ïoh ban bam lut naphang.
Ha kaba ïadei bad kane ka jingjia, u President ka MBCC u Bah Wanseng Jyrwa mar-mar ha katei ka sngi u la hiar sha katei ka jaka ryngkat ki nongïalam ba kynthup ïa u General Secretary Bah Freddystar Thabah, Organizing Secretary Bah Khamborlang Lyngdoh Nongbri bad Publicity Secretary Bah James Henry Nongbet ban leit ai jingïarap da kaba noh synñiang da ka song pisa bad ruh ban kular ban pynïoh tin sop ïing.
Ha ka 6 tarik u Bah Wanseng u la pyndep ka jingkular da kaba u la lah ban pynpoi ïa ki tin sop ïing haduh lai ban sha kitei ki lanot kiba la mad ïa ka jingduh noh ïa ka ïing.
