Nongpoh, Naiwieng 07
U Deputy Commissioner ka Ri Bhoi District ha ka Sngi Palei u la pynbna paidbah ba ha ka 14 tarik jong u bnai Naiwieng, 2024 kan sa don ka jingpyrshang ban pyntreikam ïa ka ‘Sea Plane’ lane ki liengsuiñ kiba lah ban hiar ha ki sla um da ka tnat Transport jong ka jylla ka ban sdang naduh ka por 9 baje mynstep haduh ka por 1 baje nohphai sngi ha ka pung Umïam ha Ri Bhoi District.
Halor kane ka bynta, na ka liang u Abhilash Baranwal, Deputy Commissioner ka Ri Bhoi u la pynmih ruh ïa ka hukum katkum ba la pynkup bor ha u lyngba ka kyndon 163 jong ka Bharatiya Nagarik Suraksha Sanhita (BNSS), 2023 ba la mana pyrshah ïa ki paidbah ba kin leh ïa kino-kino ki jaid jingïalehkai ha ka pung Umïam ha katei ka sngi, kiba kynthup naduh ka shong lieng, ka khwai doh bad kiwei kiwei khnang ban lait na kino-kino ki jingjia ba sngewsih.
Lyngba kane ka hukum, la mana ruh ba kino-kino kiba leh pyrshah kin shah pynngat ha ka kyndon 233 jong ka Bharatiya Nyaya Sanhita (BNS), 2023. Kane ka hukum kan treikam mardor tat haduh ba la pynbna pat da kumwei.
