Shillong, Naiwieng 11
Ka jingïalap ilekshon na ka bynta ka ilekshon MLA shiteng samoi ha Gambegre konstitwensi ka la poi sha kaba kut ha ka janmiet jong ka Lah Sngi U Blei hapdeng ka jingjai-jai khlem kino-kino ki kynrum- kynram ne ki jingpynkheiñ kyndon ha ka rukom ïalap ilekshon.
Ka por ban ïalap ilekshon ka la kut ha ka 4 baje janmiet kaba long hapoh 48 kynta sha ka sngi thep ‘vote’.
Ka jingthep ‘vote’ ha Gambegre konstitwensi ban jied MLA thymmai kan long ha ka 13 tarik kata ha ka Sngi Balang.
Haba ïakren bad u Chief Electoral Officer (CEO) ka Jylla, u BDR Tiwari u la ong ba ka jingïalap ilekshon ka long kaba ïaid beit haduh ban da poi ka sngi bakut jong ka jingïalap ilekshon.
U la ong ba ym shym la don kano-kano ka jingpynkheiñ ïa ki kyndon pynïaid ilekshon ha ka por ba ïaid ka jingïalap ilekshon kynthup ruh ha ka sngi ba pynkut ïa ka jingïalap ilekshon.
Ki nongthep ‘vote’ baroh ki don 33,088 ngut ha kaba 16,881 ngut ki dei ki shynrang bad 16,207 ngut ki dei ki kynthei.
Ha kawei pat ka liang, u CEO u la ïathuh ba ki nongpynïaid ïa ka jingthep ‘vote’ ha Gambegre kin mih ha ka Sngi Ba-ar na Tura ban leit sha la ki jong ki jaka thep ‘vote’ kiba don 51 tylli hapoh ka konstitwensi ban pynlong ïa ka jingthep ‘vote’ ha ka Sngi Balang.
Ki kynhun kiba leit ban pynlong ïa ka ilekshon kin mih ha ryngkat ki kor thep ‘vote’ ha kaba kin don ruh ki Sector Officer nalor ki Zonal Magistrate.
U CEO u la ong ba baroh 51 tylli ki jaka thep ‘vote’ kim don kano-kano ka jingïakynad ne jingma bad ki long kiba jai-jai. Ki pulit ka jylla lem bad shi kynhun ki pulit Central Armed Police Force ki don ban pyndep ïa ka kamram na ka bynta ka jingthep ‘vote’ bad haduh ban pyndep ïa ka jingñiew ‘vote’. U CEO u la kyntu ruh ïa ki paidbah ka Gambegre konstitwensi ban ïashimbynta shitrhem ban thep ïa ka ‘vote’ jong ki ha kane ka ilekshon MLA shiteng samoi. Ïa ka webcasting yn leh lut ha baroh 51 tylli ki jaka thep ‘vote’. Ka jingïakhun kan long hapdeng hynriew ngut ki kyrtong. Ka NPP ka la pynïakhun da ka Dr. Mehtab Chandee A Sangma kum ka kyrtong kaba dei ka kurim u Myntri Rangbah u Conrad K Sangma, katba ka Congress ka la sei da u Jingjang M Marak kum u kyrtong uba dei ruh u briew jong u MP ka Tura.
Kiwei pat ki kyrtong ki kynthup ïa ka Sadhiarani Sangma kaba dei ka kyrtong jong ka All India Trinamool Congress (AITC) bad kaba dei ruh ka hep kynsi jong u Dr. Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla, nalor u kyrtong ka BJP u Bernard N Marak uba dei ruh u MDC bad ar ngut ki kyrtong shimet u Sengkrabirth M Marak bad u Jerry A Sangma.
