Shillong, Naiwieng 13
Ka jingpoi ki paidbah ban thep ‘vote’ ha ka ilekshon MLA shiteng samoi ha Gambegre konstitwensi ka long kumba 90.84% kaba pyni ba ki paidbah ki la mih ryntih ha ka jingjied ban rai napdeng hynriew ngut ki kyrtong mano ban mihkhmat ïa ka konstitwensi sha ka Ïingdorbar Thawaiñ ka Jylla.
Kane ka jingpoi thep ‘vote’ kumba 90.84% ka long na ka jingdon ki 33,091 ngut ki nongthep ‘vote’ ha kane ka konstitwensi.
Ïa ka jingthep ‘vote’ la pynlong ha ki 51 tylli ki jaka thep ‘vote’ ha ka Sngi Balang naduh 7 baje mynstep haduh 4 baje janmiet hapdeng ka jinglong-jingman kaba jai-jai bad kaba ïaid beit lait noh tang ka jingbujli ïa ki kor thep ‘vote’ ha ka por mynstep ha ka por ba dang pyrshang thep ‘vote’ ha kaba la don ka jingbujli ïa kawei ka VVPAT. Ynda la sdang shisha ka jingthep ‘vote’ la bujli ïa lai tylli ki balloting unit, lai tylli ki controlling units bad 6 tylli ki VVPAT kiba la hap ban bujli noh ha ki 5 tylli ki jaka thep ‘vote’.
Haba kren sha ki lad pathai khubor, u Chief Electoral Officer (CEO), u BDR Tiwari u la ong ba ka jingthep ‘vote’ ka long kaba ïaid beit naduh 7 baje mynstep haduh 4 baje janmiet tangba ki don ruh ki jaka thep ‘vote’ kiba dang bteng ka jingthep ‘vote’ wat haduh 6 baje janmiet.
U la ong ba ka jingkheiñ halor ka jingpoi ki paidbah ban thep ‘vote’ ka lah ban kylla bad nangkiew na ka jingkheiñ kaba la ïoh kumba 90.84% haduh ka por 6 baje janmiet.
Ka jaka thep ‘vote’ kaba don ha Sanjengpara ka dei kaba bun tam eh ka jingwan ki nongthep ‘vote’ kaba long kumba 95.60%.
Ki don ruh 32 ngut kiba thep ‘vote’ na la ïing kiba kynthup 15 ngut kiba la kham noh ka rta bad 17 ngut kiba duna dkhot met.
Ha kane ka ilekshon shiteng samoi, ka jingïakhun ka long kaba jwat bad ka dei ruh ka jingïakhun na ka bynta ka burom khamtam eh ïa ka NPP bad ka Congress.
Ka Congress ka dei beit ban jop khnang ban bat biang ïa ka Gambegre konstitwensi kaba la ju mihkhmat da u MLA ka Congress u Saleng A Sangma uba la long mynta u MP ka Tura. Katba ka NPP ka hap ban jop ïa kane ka ilekshon kum ka seng kaba don ha ka bor synshar, khamtam haba ka pynïakhun da ka kurim jong u Myntri Rangbah, ka Dr. Chandee A Sangma kum ka kyrtong.
Ka Congress ka pynïakhun da u Jingjang M Marak kum u kyrtong bad ka TMC ka pynïakhun da ka Sadhiarani Sangma kaba dei ka kyrtong jong ka All India Trinamool Congress (AITC) bad ruh ka hep kynsi jong u Dr. Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla. Kiwei pat ki kyrtong ki long u Bernard N Marak kum kyrtong ka BJP uba dei ruh u MDC, nalor ar ngut ki kyrtong shimet u Sengkrabirth M Marak bad u Jerry A Sangma.
Ka Gambegre konstitwensi ka dei kawei na ki konstitwensi kaba ki paidbah ki ju mih bha ban leit thep ‘vote’ ha ki ilekshon jied nongmihkhmat la ka dei ha ka ilekshon MLA ne ilekshon MP naduh kham mynshwa.
Kum ban pynkynmaw, ka jingpoi thep ‘vote’ ha Gambegre konstitwensi ka long 91% ha ka ilekshon MLA ha u snem 2013, nangta 90.52% ha ka ilekshon MLA ha u snem 2018 bad 90% ha ka ilekshon MLA ha u snem 2023.
Ha ka ilekshon MP Lok Sabha, ki paidbah ka Gambegre ki mih bha ban leit thep ‘vote’ kaba long 81.81% ha ka ilekshon MP ha u snem 2019 bad 83.76% ha ka ilekshon MP ha u snem 2024.
Halor ka jingïoh kurup pisa bad ki tiar ki tar ha ka por ilekshon, u CEO u la ong ba lada kheiñlang ïa ka jingïoh kurup baroh ka kot sha ka T. 12.72 lak kaba kynthup T. 1.79621 lak ka pisa, T.3.09945 lak ka kyiad, bad kiwei kiwei ki jingsam sngewbha kaba kot sha ka T. 5.4248 lak, nalor u drok kumba T. 2.40 lak.
