Shillong, Jymmang 14
Ka Meghalaya Pradesh Congress Committee ha ka 14 tarik u Jymmang 2026, ka la pynbna ïa ka kyrteng u kyrtong u ba ka party ka la ibit ban ïakhun sha ka ilekshon MP shiteng samoi sha Lok Sabha na Shillong Parliamentary Seat da u Bah Vincent H Pala.
Haba ïakren sha ki nongthoh khubor u Bah Vincent H Pala President MPCC u la ong ka party ka ibit biang ban pynïeng ïa u kum u kyrtong ka Congress ban ïakhun ha kane ka ilekshon shiteng samoi ban sa long shen.
“Haba ïadei ka ilekshon MP shiteng samoi, ngi la rai da kawei ka sur ba ngim dei ban khot da ki briew kiba nabar ban ïaleh na ka tiket Congress ha kane ka ilekshon shiteng samoi, lada ka long kumno kumno ruh ngi dei ban ïaleh beit hi da kaba shlur bad ngi la rai ban aiti bad bynshet ïa nga kum u kyrtong ha kane ka ilekshon” la ong u Bah Vincent.
Shuh-shuh u la pynpaw ba u la dep ban long kum u MP la khatsan snem bad ha kane u la don ka jingmut ban nym ïakhun shuh, hynrei ka party ka dang kwah ïa u ban ïakhun biang bad kdew ba ha Delhi hi donkam ban ïoh nongmih khmat na ka party kaba heh khamtam ha kane ka juk bad kynnoh ba ka BJP ka la thaw ki aiñ kiba khyllah-khyllah ban thombor pyrshah ïa ki Khristan.
Haba ïadei ki jingkynthoh ba u Bah Pala u la leh aiu ha ki 15 snem ba la dep, u la pynshai ba dei tang ma u u MP u ba tista bha hapoh Parliament bad kdew ba ka jingpoi jong u ha ka Dorbar ka long haduh 92% na ka shispah bad pynïanujor ïa kiwei pat ki dkhot ka ïingdorbar tang kumba 70% ruh kim ju poi ha ïingdorbar.
Shuh-shuh u la ïathuh ba u ju ïashim bynta ha ka jingïathir ïatai ïa ki bill bapher-bapher, “264 tylli ki jingkylli nga la wanrah, 34 sien nga la rah ïa ka mat ïakren, hynrei nga khlem pynpaw ha ki rynsan paidbah (Social Media) katba kiwei tang katto katne sien ki kren ki la pynpaw ha ki rynsan bapher-bapher” u la ong.
U la ong ba ha ka jingïalang jong ka party ki la ïakren ba kin sa sei madan ïa ki kam ba u la trei bad pynpaw ka jingkyrmen ba ki paidbah kin sa phai khmat ban jied ïa ka Congress ha kane ka ilekshon shiteng samoi ban wan.
