Shillong, Jymmang 14
Ka Khasi Jaiñtia Deficit School Teachers Association (KJDSTA) ha ka sngi Palei jong ka taïew, ka la kynnoh ba ka Sorkar Jylla ka la leh ïa ka kam ka bym shaniah bad pynmih ïa ki hukum kaba mynsaw halor ka Meghalaya Non-Govern-ment School and College, Employees Centralised Provident Fund Scheme, 2026, hadien ba ki nonghikai deficit ki la shah bthah, ba kidei ban mih noh na ka jingïalang bad la kynnoh ba katei ka jingïalang ka la ïaid shakhmat wat hapdeng ka jingbym don shuh ka jong ki ruh.
Haba kren sha ki lad pathai khubor, u President ka KJDSTA, u Bah Boswell Pala u la ong, ba ka seng ka la ïashimbynta ha ka jingïalang tang ban pynpaw ïa ka jingsngewkhia ïa kaba ka Sorkar ka lah dep ban tip lypa.
“Wat hapdeng jong ka jingtip ïa ka jingshisha, ka Sorkar ka la tip ïa ki jingsngewkhia jong ngi, kiba long kiba dei hok bad kiba shong aiñ, ha kaba ïadei bad ka Meghalaya Non-Government School and College, Employees Centralised Provident Fund Scheme, 2026, ka Sorkar ka la khot ïa ngi sha ka jingïalang, ban sngewthuh ïa ki jingsngewkhia jong ki nongtrei Deficit” la ong u Bah Boswell.
“Ngi la leit sha ka jingïalang da kawei ka jingthmu, ban ong sha ka Sorkar, ba lada ka la dep jied, na ka bynta ka jingbit jingbiang jong ka, ba kan ong ba kam sngewthuh ïa ka jingsngewkhia jong ki nongtrei Deficit, kumta ngin leit sha katei ka jingïalang” u la bynrap.
U Bah Boswell Pala u la ong ruh, ba ka seng ka la pyrshah ïa ka jingdonlang jong ki bym dei ki nongtrei Deficit ha ka jingïalang. “Hapdeng ka jingïohsngew bad ka jingïohi ba kiwei pat ki bym dei ki non-government, non-deficit ki la don ha ka jingïalang, ngi la pyrshah jur ïa katei, nalor kane ban pyrshah ruh ïa ka mat ba ka la don ka jingïai bteng ban pynduh ïa ki Board of Trustees, kaba la lam sha ka jingpynhiar kyrdan bad ruh ka jingbym khot lang ïa ki nongtrei Deficit na kiwei pat ki seng” u la ong.
“Ha ka jingbym mutdur jong ngi, tang hadien ba ngi la mih noh na ka jingïalang, ngi la ïoh jingtip, ba ki la don shuh shuh ki jingïakren ha katei ka jingïalang ïa kaba la shim hadien ba ngi la ïa mih noh” u la ong.
“Ka long kaba pynkulmar khlieh ban ïohi ba u nongpynïaid ïa ka jingïalang ula ong ïa ngi, ba ngi lah ban mih noh bad ngi la mih noh, katba kiwei pat ki briew ki la shong beit bad ïatai halor kiwei-kiwei ki mat bad ai jingmut bad ki jingpyni hapdeng ka jingbym don shuh ka jong ngi. Kine ki jingai jingmut bad ki jingpyni hapdeng ka jingbym don jong ngi, kidei kiba la pdiang da ka tnad pule puthi bad ka la pynmih syndon da ka hukum kiba ktah jur ïa ki nongtrei Deficit bad ktah jur ruh ïa ka pule puthi baroh kawei hapoh ka jylla Meghalaya. Kane ka rukom leh ka long ha ka rukom kaba tad dor bha” ong u Bah Boswell.
U Bah Boswell u la kdew, ba katei ka jingpynbna kaba shah ïa ki nongtrei ba kin ym shim ïa ka CPF kum ka sabut jong ka jingthmu ban buh ha ka jingma ïa ki nongtrei Deficit. “Ki jingai jingmut bad ki jingpyni, ki la kdew bad batai shai kdar ïa ka jingthmu ban pynmynsaw ne buh ïa ngi ha ka jingma bad ïa ka pule puthi bad kata kadei ka jingpynbna ba ki nongtrei ki lah ban jied ban ïaid lait noh na ka CPF” u la ong biang.
“Ka hap long kaba shai ba ki nongtrei kiba don ïa ka CPF ïa mynta hi kidei tang ki nongtrei Deficit bad ban don ïa ki briew ki ban kren na ka bynta ki nongtrei Deficit bad ban pynlong ïa ka Sorkar ban pynmih ïa ka jingpynbna ka ban ktah jur ha baroh ki liang, kine ki briew bad ka Sorkar ki la leh ïa kaba bakla, ka rukom treikam kaba bakla bad katkum ka aiñ ruh ka long kaba bakla. Kumno kine ki briew ki lah ban rai na ka bynta ka jong ngi haba ngim don lang shuh ha ka jingïalang?” la buh jingkylli u Bah Boswell Pala. “Kane ka pawshai kdar, ba kadei ka jingleh kaba sniew da kitei ki briew kiba pyrkhat ba ki lah ban leh ïa kiei-kiei, tang namar ba ki don ha ka bor” u la bynrap biang.
U President ka KJDSTA u la buh jingkylli ïa ka rukom leh jong ka Sorkar ban pynmih ïa katei ka jingpynbna bad ban pynïaid shakhmat ïa katei ka scheme 2026, wat haba ka dang don hapdeng jong ka jingbishar. “Kumno ka Sorkar ka lah ban pynmih ïa ka jingpynbna kaba kyllaiñ ban ong ïa ngi ki nongtrei Deficit ban ym shim shuh ïa ka CPF, haba ka la dep ong ïa ngi, ba kan sa khot da ka jingïalang kaba biang?” u la ong.
Shuh shuh u la ong ba kumno ka Sorkar ka lah ban pynmih ïa katei ka jingpynbna kaba don hapdeng ka jingshah buh jingkylli bad pynbor ban pyntreikam ïa ka Scheme 2026, haba ka Sorkar dalade hi ka la ong ha ka jingïalang, ba ïa ki sienjam na ka bynta jong ka jingpyntreikam ïa katei ka scheme, yn sa rai kham hadien namar ba kane ka mat kadei kaba dang don hapdeng ka jingtian bishar jong ka Meghalaya High Court” ong u Bah Boswell Pala.
U Bah Boswell Pala u la ong, “Ngi sngewthuh ïa ka jingthmu kaba sha lyndet jong ka Sorkar ban pynurlong da kaba pynmih ïa ka Scheme 2026. Ka mat kaba hakhmat eh kadei tang ka buit ban kiar ïa ka mukotduma jong ki nonghikai bad nongtrei Deficit” u la ong.
Namarkata, u la kyntu ïa ka Sorkar ba kadei ban pyntreikam pura beit noh ïa ka Scheme 2023 bad ïa ka National Pension System.
Ka KJDSTA ka la buh jingkylli ruh ba balei ka SBI Mutual Fund, kaba la ithuh kum ka Portfolio Manager jong ka CPF ha ka 16 tarik u Risaw 2025, kam shym la shah khot sha ka jingïalang kaba la long ha ka 06 tarik u Jymmang, 2026.
“Ngi kwah ruh ban tip na ka Sorkar, kaei kaba la jia ïa ka SBI Mutual Fund, kaba la shah ithuh kum ka Portfolio Manager jong ki Non-Govt Schools & Colleges Employees Central Provident Fund ha ka 16 tarik u Risaw 2025. Namar ha ka jingïalang ha ka 06 tarik u Jymmang 2026, ym shym la don kino-kino ki briew na ka SBI Mutual Fund kiba la shah khot, katba ki nongmihkhmat na kiwei pat ki Bank ki la wan ban ïashimbynta” ong u Bah Boswell.
