Shillong, Jymmang 14
Ki Pulit ka Jylla ha ka sngi Palei kila ïoh ban kem noh ïa ki arngut ki briew kiba dei na Cachar District jong ka Jylla Assam bad ïoh kurup haduh 30,000 ki detonator bomb na ka kali na Umkiang, East Jaiñtia Hills ha ka 13 tarik Jymmang.
Ha ka kyrwoh khubor, u Superintendent of Police ka EJH u Pankaj Kumar Rasgania u la ong, kane ka jingkem kala wan jia ha ka por ba dang ïaid ka jingtalasi kali ha ka por 2:30 mynstep. Ki Pulit ka Umkiang Police Patrol Post kila ïoh bat ïa kine ki briew na kawei ka kali Hyundai Eon kaba dang leit sha Silchar.
U SP u pyntip ba ha ka jingtalasi ïa ka kali, ki pulit kila ïoh kurup ïa bun bah ki detonator bala buhrieh hapoh ka kali.
“Ka jingkhynra kaba bniah bha ïa ka kali kala lam sha ka jingïoh kurup haduh 30,000 ki detonator bom. Ïa kine ki detonator la buhrieh hapoh ki artylli ki synduk bad kawei ka pla,” ong u Rasgania.
Ki pulit kila kem noh ïa ki briew kiba don hapoh ban pynlong ïa ka jingtohkit. Kine ki arngut ki kyrteng u Kamrul Ali Laskar uba dei na Jamalpur, Cachar, Assam bad u Ibrahim Uddin Laskar uba dei na Loknathpur, Cachar, Assam.
Ki pulit kila register case ïa kine ki arngut ha thanad Lumshnong hapoh ki kyndon ka Explosive Substance Act bad ka jingtohkit kala ïaid shakhmat ban lapdien ïa ka thymmei ba ïoh ïa kine ki detonator bad ki nongpdiang ïa ki.
