Nongstoiñ, Jymmang 14
Ki saw ngut ki nongbylla kila poi hospital namar ka jingkem pang kaba kyndit kynsan hadien ba kila bam ïa uwei na ki jhur khlaw ba suba long bih ba la shet lang bad u sla phandieng bad u kliar sohkrot.
Kine ki saw ngut kiba la shitom ki kynthup ïa u Bah Shningstar Sohshang (40 snem), u samla Alfast Nongkseh (17 snem) kiba na ka shnong Marang Jaidoh, u Albert Lyngkhoi (28 snem) na ka shnong Nongsleh bad u Phrang Ryntong (20 snem) na ka shnong Mawkhlam Nongpyndeng. Katkum ka tyllong khubor ba la ïoh lum la ïathuh ba katei ka jingjia kala jia ha ka 13 tarik u Jymmang katba kitei ki 4 ngut ki dang don ha ka jaka bylla lajong ha ka thaiñ Mawlan ka shnong ba don marjan bad ka thaiñ Langpih.
Shuh shuh la ong ruh ba hadien ba kila kem pang jur la pynkit noh ïa ki mar mar sha ka jaka ai jingsumar ha Civil Hospital Nongstoiñ ban pynïoh ïa ka jingsumar kaba kloi.
Kitei ki saw ngut ki briew kiba la ngat ha katei ka jingjia kila ïathuh ba ki la leit ban trei bylla shna pipe ha katei ka jaka bad baroh ki ïadon 5 ngut ba kynthup ïa u nongñiah kali uba la lait na katei ka jingjia bad kila ong ba namar ba ka bneng ka slap baroh kila ïarieh slap hapoh ka jaka ba sher dara.
Nangta, hadien ba la rang u slap ki la khreh ban leit trei biang hynrei uwei na ki, uba la thngan u la nang bam ja noh katba ki saw ngut na ki, kila leit trei shwa namar ba kim pat sngew thngan.
La ïathuh ruh ba ha ka por ba ki mut ïa bamja kila ïashet hi ïa ki jhur khlaw kiba long ban bam kum u sla phan dieng bad u kliar sohkrot hynrei uwei na ki nongtrei u la wanrah ïa uwei u jhur khlaw ba suba long bih ïa kaba u la dep khoh snep lypa bad u la ong ruh ba u long ban bam namar ba u la shait bam kum ïa utei u jhur bad kumta kila shet lang.
Ki la ïathuh ruh ba kila ïadep bam ja baroh saw ngut bad mar ïadep kila sdang sngewthuh ïa ka jingshitom da kaba ktha ka khlieh bad kynroi prie bad sdang ka byria ki khmat.
Shuh shuh la ong ruh ba suki suki ki la sdang sa ka kem kyiuh sa ka met bad kynroi prie biang bad haduh ban da ring tyrsaiñ sa ki kjat haduh bym lah ïaid shuh.
