Shillong, Jymmang 14
Ka Director General of Police (DGP) Kong Idashisha Nongrang ha ka sngi Palei, kala pyntip ba ka tnad Pulit kala phah ïa ka kynhun SF-10 bad ar pyrton ka Meghalaya Battalion sha shnong Lapangap ha West Jaiñtia Hills bad pyntip ruh ba ka tnad ka dang pyrkhat ruh ban buh ïa ka len pulit ha ka thaiñ hadien ba ka Assam kala buh ïa la ka jong ka len hadien ba mih ka jingïakynad.
Kane ka jingpynbna ka mih hadien ka jingwan tur ban ïakhih da ki paid Lapangap sha Secretariat ha ka sngi Balang, ha kaba kila dawa ban ai ïa ka bor pahara ïa ki nongrep, kiba la mad ïa ka jingshah jynrat ki jingthung jingtep ha ka por mynmiet ha ka kynhun kiba dei na Karbi Anglong.
Ka DGP ka ïathuh ba kane ka jingphah bor pahara ka dei kaba la shim rai ha ka jingïalang bala pynlong da u Symbud Myntri Rangbah, ïa kaba ka tnad Pulit kala ai ka jingkyrshan.
“Ha ka por ba mih nyngkong kane ka jingïakynad, ngi la phah ïa ki SF-10 jong ngi. Ki kwah ïa ka jingdon ka kynhun SF-10 ha ka thaiñ,” kala ong bad bynrap “Ki SF-10 ki la hiar ha ka sngi Palei”.
Halor ka jingdon briew, ka DGP kala ong, “Ka pyrton ïa mynta bad ngin sa peit katkum ka jinglong jingman, ngin sa peit la ngi donkam ban phah shuh ïa ki briew ne em”.
Kala pynthikna ba ki ar pyrton jong ka Meghalaya Battalion kila hiar haba sdang jong kane ka taïew. “Dang mynshisngi ruh, ngi la dep phah ïa ar pyrton ki pulit ka Meghalaya Battalion sha katei ka jaka”.
Ka Kong Nongrang kala ban jur ba ka jingdonkam ban phah briew shuh shuh kan shong eh ha ka jinglong jingman. “Kan shong eh ha ka jinglong jingman. Haba ngi phah na ka bynta ban tehlakam ïa ka suk ka sain, ka shong baroh na kaei kaba jia. Ka dei ka kam kaba kylla, ngi hap ban peit man ka khyllipmat,” ka la ong.
Halor ka jingdawa ki nongshong shnong ïa ka Police Outpost, ka DGP kala ong ba ka Meghalaya kan sa shong pyrkhat ban buh ïa ka len pulit, haba pynpaw ba ka Assam kala dep leh ïa kane.
“Kumba phi tip ba ka Assam kala pynbor ba ngi dei ban bat ïa ka status quo. Kumta, katba ïalade kila buh ïa ki, kaba ïasyriem kum ka len. Kumta, haba peit thuh ïa ka jinglong jingman, ngi ruh ngin sa khmih, ngin sa buh ïa ka len,” ong ka Kong Nongrang.
Kala kdew ba ka Barato Outpost kaba dang shu plie ha ka sngi Saitjaiñ, ka don kumba 16-19 kilometer na Lapangap.
“Ki paidbah ka Lapangap kila wan hynnin ka sngi. Kiba wan kila bun bha. Ki ophisar jong nga kiba don sha surok kila pyntip ba bun na ki nongshong shnong ka Lapangap kila ïamih hynnin ka sngi,” kala ong.
“Ka dei ka jingeh kaba dei hok shisha ïa ki. Kila ïai ong ba katba na ka liang ka Assam kam shym la khang ïa ki ban leit rep hynrei kaei kaba jia, kila leit rep ha ka por mynsngi bad ha ka por miet, kat kaba ki thung, kila shah jynrat lut. Kane ka dei ka jingeh kaba kila ïakynduh shisha bad kila ong ba kim shym la ïoh satia ïa ka jingkyrshan lem na ngi bad ngi la pyrshang hi kat kaba lah,” bynrap ka Kong Nongrang.
