Shillong, Naiwieng 13
Wat lada ka Hynñiewtrep Integrated Territorial Organisation (HITO) Shillong City ka la dep buh ejahar mynta la ar taïew, hynrei ki pulit ka jylla kim pat lah ban leit kem ne tohkit ïa ka samla Khasi kaba ai kyrteng Anisha ha ‘social media’ kaba la pynthohbria ïa ki seng bad ki pulit haba ka sah ha Bangalore.
Kum ban shu pynkynmaw, ka HITO ka la leit ban ai da ka ejahar pyrshah ïa katei ka samla ha ka 28 tarik u Risaw 2024 ha shlem treikam u Superintendent of Police, East Khasi Hills Shillong namar ka jingkren khlemakor bad pynjah burom jong katei ka samla ha rynsan ‘social media’.
Haba ïakren bad u President ka HITO Sengkmie, Bah Donbok Dkhar, u la ïathuh ba hadien ar taïew ba la ai ejahar ki pulit kim pat leh eiei namar ki dang phah sha ka ïingbishar. U la ong ba ka seng kan dang peit nangne shakhmat la kata ka aiñ hapoh ka jylla ka tlot ne ka khlaiñ.
Nalor kane, u la ai nuksa ïa ki pulit Mizoram, Nagaland bad Arunachal Pradesh lada ki kren beiñ ïa ka jaidbynriew jong ki pulit jong kitei ki jylla, ki nud ban leit kem ïa ki briew kiba sah shabar ka jylla. Hynrei u la buh jingkylli, balei ki pulit ha Meghalaya kim nud ban leit kem ïa ki briew kiba sah shabar ka jylla lada ki kren beiñ ïa ka jaidbynriew?
U la kyntu ruh ïa ki samla kiba leit pule shabar ka jylla ki dei ban sngewthuh ïa ka jingtrei shitom ki kmie ki kpa, ki dei ban trei shitom khnang ban myntoi ïalade bad ïa ka jylla, ym ban leit pynjah burom ïa ka long rynïeng bad ïa ka jaidbynriew.
