Shillong, Naiwieng 15
Ka National People’s Party (NPP) ka la pynrem jur ïa ka jingkynthoh u MP ka Congress na Tura, u Saleng A Sangma uba la kynnoh ba ka jingleit pynïasoh jong lai ngut ki MLA Congress sha ka NPP ka don bynta bad ka pisa drok.
U Working President ka NPP, Bah Hamletson Dohling u la ong ba ka jingkren jong u MP ka Congress na Tura u Saleng A Sangma ka dei kaba la shu kren laplah.
U la ong ba u Nongïalam ka Congress u la dei ban bishar bad tohkit shwa na la ka jong ka ïing balei ba kine ki lai ngut ki MLA ki hap ban phet lane ban mih noh na ka Congress.
U la ong ruh ba ïa kum kitei ki jingkren khyllung khynnah na ka liang ka seng ka pynrem jur bad kan ym lah lano-lano ruh ban pdiang.
U Nongïalam ka NPP u la ong shuh shuh ba kane ka lah ban dei ba ka don kano-kano ka kam kaba ym lah shuh ban teh lakam hapoh ka Congress haduh ba ym lah shuh ban pynhun ïa ka jingdonkam ha ki konstitwensi jong ki kaba pynlong ïa kine lai ngut ban wan pynïasoh sha ka NPP.
“Ka jingrung ki lai ngut ki MLA sha ka NPP ka dei hadien ba ki ïohi ïa ka jingtreikam bad ka jingdon ki nongïalam kiba kynsai ha ka NPP kaba la pynskuiñ pat ba kin wan pynïasoh noh sha ka party,” u la ong.
Haba pynshai shuh shuh halor ka jingkynnoh, u Bah Hamlet u la ong ba dei ka Sorkar Jylla kaba lamkhmat da ka NPP kaba ïakhun tyngeh mynta ban pynduh jait ïa u drok bad kiwei ki jingsniew ha ka imlang-sahlang.
“Ngi kwah ban kren shai ba ka party kan ym ailad ba une u jingdih ba sniew un kharoi ha ka jylla jong ngi”, u la ong.
U Bah Hamletson u la ong shuh shuh ba ki briew ba don ka jingkitkhlieh ki pang ka mynsiem haba ïohi ïa ka jingbun ki samla kiba la ngop ha u drok, bad bynrap ba kum ka seng NPP kaba ïalam mynta ïa ka Sorkar kan pyrshang lut ki lad ki lynti, da kaba kdew ïa ki sienjam jong ka Sorkar ban pynduh jait ïa u drok lyngba ka jingwanrah ïa ka DREAM.
