Shillong, Naiwieng 18
Ka Sorkar Jylla kan phaikhmat biang ban ïohlad ban tei da ki projek pynmih bording ilektrik kiba kham rit bad yn pan jingkyrshan lang na ka Sorkar Pdeng ban pynïaid shakhmat ïa ki projek.
Hadien ba la pyndep ban tei ïa ka Myntdu Leshka projek ha War Jaiñtia kaba kham heh, ym pat don da kiwei pat ki projek bording kiba heh kiba la sdang ban tei ha kane ka Jylla.
Bun tylli ki projek bording ilektrik kiba la soi soskular bad ki kompani bapher bapher ki khlem ïaid shakhmat mynta la bun phew snem.
Wat ki projek kiba la aiti sha ka NEEPCO ki la shimpor bha ban pyntrei namar ka rukom long ka jaka ka long kaba riat bad lhuh bha kaba buh jingeh ban pynpoi ïa ki tiar ki tar.
Dang shen, u Myntri ka tnat bording ka Jylla, u AT Mondal u la pynsngew ha u Myntri ka tnat bording ka Sorkar Pdeng u ML Khattar halor ka jingpynkhreh ïa ki projek bording kiba rit ha kane ka Jylla bad ki don ruh ki projek kiba la dep ban pynkhreh DPR bad kiba lah ruh ban sdang pyntrei noh.
Namar ka jingduna pisa bad donkam ka jingkyrshan, u Mondal u la kyrpad ïa ka Ministry New and Renewable Energy ka Sorkar Pdeng ban sdang biang ïa ka Central Financial Assistance kaba T. 7.5 klur shi mega watt na ka bynta ban shna ïa ki projek bording kiba rit khnang ba ki jylla barit kum ka Meghalaya kin ïoh jingmyntoi.
Na ka liang u Secretary ka tnat New and Renewable Energy ka Sorkar Pdeng u la pyntip na ka bynta ban ïatai ïa ki jingeh kiba dei jong ki Jylla ka Thaiñ Shatei Lam Mihngi, donkam ban ïakren biang ha kaba yn sa don ka jingïakynduh lang jong ki Jylla na North East ha Shillong ha ka 27 tarik bad 28 tarik mynta u Naiwieng.
Ka Jylla Meghalaya ka dei ruh kaba biang ban tei ïa ki ‘Pumped Storage Project’ bad na ka liang u Mondal u la pynsngew sha u Myntri ka Sorkar Pdeng ba ka Jylla ka don ka lad ban pynmih bording ilektrik kumba 4,800 MW lada lah ban tei ïa ki Pumped Storage Project. Hynrei namar ba ka dor bai shim bording na kine ki projek ka long kaba kham heh, u Mondal u la kyrpad ruh ban kham pyrkhat na ka bynta ka jingmyntoi ka jylla ha ka liang ka jingai ei ïa ka bording sha ka Jylla.
