Shillong, Naiwieng 20
Hadien ba la dep lut ka jingthep ‘vote’ ha ki ilekshon MLA ha Jharkhand bad Maharashtra bad ki ilekshon shiteng samoi ha kylleng ki Jylla jong ka ri kynthup ha Gambegre konstitwensi, ka por ka la dei sa ban batai ïa ka jingkheiñ jingdiah mano ba kham wan shakhmat ban ïoh ïa ka jingjop ha ka sngi ñiew ‘vote’.
Hynrei haba phai sha ka jingthep ‘vote’ ha ka ilekshon MLA shiteng samoi ha Gambegre konstitwensi kaba la long ha ka 13 tarik mynta u Naiwieng, ka long kaba kham eh ban batai lypa mano napdeng ki 6 ngut ki kyrtong ban poi shakhmat ban ïoh ïa ka jingjop.
Ka jingïakhun ha Gambegre konstitwensi ka long kaba kham ïakhaid khamtam hapdeng ka NPP, TMC bad Congress haba sngap thuh na kaei kaba la pynpaw da kiba bun ki paidbah haduh ka sngi thep ‘vote’ bad hadien ba la dep ka jingthep ‘vote’.
Ka don ka jingbatai kaba pyni ïa ka jingkheiñ ba ka Congress bad ka TMC ki dei kiba la don ‘vote’ lypa namar ka TMC ka pynïakhun da ka MDC ka Sadhiarani Sangma, bad u kyrtong ka Congress u Jingjang M Marak ruh u la don lypa ka ‘vote’ lyngba u MP ka Tura, u Saleng A Sangma uba la ju long u MLA ka Gambegre la kumba 15 snem.
La ong ba ka NPP wat la ka dei kaba ïalam ïa ka Sorkar, ka dei kaba dang hap wad ‘vote’ bad hap ïoh bun bha ki nongkyrshan da kaba khroh ïa ki paidbah kiba la ju kyrshan ïa ka TMC bad ka Congress ha ki ilekshon kiba la leit.
Hynrei ka don ka jingkheiñ kaba pynshong nongrim ba ka NPP bad ka kyrtong jong ka, ka Dr Chandee Mehtab A Sangma kaba dei ruh ka kurim u Myntri Rangbah ka Jylla, ka dei kaba lah bha ban khring ïa ki paidbah ban ai jingkyrshan ha kane ka ilekshon shiteng samoi. La ong ruh ba ka NPP lyngba u Myntri Rangbah lem bad kiwei pat ki Myntri bad MLA bad nongïalam ki la trei borbah ha kane ka jingïakhun ha kaba ki la lah ban khring ïa ki paidbah ban ai jingkyrshan ha ka kyrteng ki kam pynroi lyngba ka seng kaba don lypa ha ka bor synshar.
“Ka dei ka jingïakhun para ba ïakhlaiñ hapdeng ki kyrtong jong kine ki lai tylli ki seng,” la pynpaw uwei u nongpeit pyrman uba lum jingtip bad buddien bha ïa ka jinglong-jingman ha kane na ilekshon ha Gambegre.
Wat hapdeng ka jingbym shai, ka don kawei ka jingbatai ba ka kyrtong ka NPP ka lah ban ïoh jingjop kum ka seng kaba don ha ka bor synshar namar ki nongïalam ka NPP ki kham nud ban kular ïa ki paidbah ban pynurlong ïa ki jingdonkam khamtam eh ki kam pynroi kiba hakhmat eh kiba dei ban wan ha Gambegre konstitwensi.
La ong ruh ka jingkheiñ ka pyni ba ka jingïakhun ka kham ïajan hapdeng ka NPP bad ka TMC katba ka Congress ka wan kham shadien, wat lada u kyrtong jong ka u la kham khlaiñ ban ïoh jingkyrshan shitaïew shwa ka jingthep ‘vote’ namar ka jingleit ïalap ilekshon ki nongïalam ka Congress khamtam lei lei ha ki jaka ba poi bha u Saleng A Sangma ban leit ïalap ilekshon.
Kiwei pat ki kyrtong kum u Bernard Marak jong ka BJP ruh u kham ïoh ‘vote’ namar ki don ki jaka kiba hap ha Gambegre ha ka ilekshon MLA hynrei ha ka ilejshon MDC pat ki hap hapoh Tura ADC konstitwensi.
Ym don kiba nud ban ai jingkheiñ ba u kyrtong ka BJP un poi sha ka thong, wat lada u lah ban kham khlaiñ ha ka jingïoh ‘vote’.
Kiwei pat ar ngut ki kyrtong shimet, u Jerry A Sangma bad u Sengkrabirth M Marak kiba ïakhun ha kane ka ilekshon ki kham duna ka jingïoh ‘vote’ lait noh tang ha katto-katne ki jaka.
Hapdeng ka jingkheiñ jingdiah kaba shu antad, bad ka jingap lynga khamtam lei lei ki kyrtong, dei tang ha ka sngi ñiew ‘vote’ yn sa shai kdar mano ban ïoh mihkhmat bujli ha ka jaka u Saleng A Sangma ïa ka Gambegre konstitwensi sha ka Ïingdorbar Thawaiñ ka Jylla.
