Shillong, Naiwieng 21
Ka tamasa jong lai tylli ki jaidbynriew kiba don hapoh ka Jylla ba la tip kum ka ‘Tri Hills Ensemble’ ka ban sa long ar sngi lynter ka la sdang ha ka Sngi Palei ka 21 tarik ha U Soso Tham Auditorium ha kaba u Myntri Rangbah ka Jylla, u Conrad Sangma u la plie pyrda ïa katei ka tamasa ha ryngkat ka jingïadonlang u Myntri tnat jngoh kai pyrthei ka Jylla, u Bah Paul Lyngdoh.
Ïa kane ka tamasa ‘Tri Hills Ensemble’ la pynlong ha ka sien balai ha kaba ka la don ka jingpyninam ïa ka jingriewspah jong ki kam shna jingshna, ki jait jingbam tynrai bapher-bapher bad ka kolshor jong ki lai tylli ki Jaitbynriew jong ka Jylla Meghalaya kiba kynthup ïa ka Khasi, Jaiñtia bad Garo.
Haba ai jingkren ha katei ka sngi, na ka liang u Myntri Rangbah ka Jylla, u Conrad K Sangma u la ai ka jingïaroh ïa ka tnad Arts & Culture kaba la trei khlem shongthait ban kyntiew ïa ka riti dustur ba kyrpang jong ki Khasi, Jaiñtia bad ki paid Garo jong ka Jylla Meghalaya.
“Kane ka tamasa ka dei ka jingrakhe ïa ka kolshor jong ngi, ka imlang-sahlang bad ki briew jong ngi. Lyngba kane ka tamasa, ngi thmu ban pyni ïa ka jingriewspah jong ka jingpher bad ka jinglong tynrai jong ki briew jong ngi,” ong u Myntri Rangbah.
Haba kren halor ka jingdonkam jong ka kolshor, u Myntri Rangbah u la ong, “Ka kolshor ka don shibun ka bor bad ka jinglah namar ka pynïasoh ïa ngi bad ki tynrai jong ngi, ka mynnor jong ngi, ka jinglong kyrpang jong ngi bad ka pynïapher ïa ngi na u paidbah. Kum ka rukom jong ka bor ba jem, ngi pyrshang kum ka Sorkar ban pyndonkam ïa kane ka jinglah bad ban pyllait ïa ka na ka bynta ki jingthmu kiba tei.”
Haba pynksan ïa ka jingdonkam ban thoh ïa ki kot ki sla, u Myntri Rangbah u la kdew ruh shaphang ka CM Research Fellowship Program ha kaba haduh 50 ngut ki nongwad bniah na ki bynta bapher-bapher jong ka Jyllla ki shah bei tyngka na ka Sorkar Jylla ban wad bniah ïa ki bynta bapher-bapher jong ka kolshor, bad ban buh jingthoh ïa ka.
U la ai khublei ïa ka tnad art and culture kaba la shim khia ban pynbha dur ïa ka jaka buh jingthoh jong u Captain Williamson Sangma, bad pynshlur ïa ka tnad ban pyndonkam ïa ka teknoloji na ka bynta ka jingshemphang kaba kham bha halor ki bynta bad ki jingim bapher bapher jong ki briew jong ka jylla. “Ki jingïalang bad ki tamasa jong ngi ki rakhe ïa ka jingriewspah jong ka jylla,” u la ban jur.
Yn sam ruh ïa ki khusnam ba pawnam jong ka State Literary Award ha kane ka jingïalang kaba ar sngi, kaba long ban ithuh ïa ki nongnoh synñiang ba radbah ha ka thoh-ka tar ha ka ktien Khasi bad Garo, ha kaba yn pynkupburom ïa ki saw ngut ki nongïoh khusnam.
Ha katei ka sngi la pyllait ruh ïa ka kot “A Synthesis of Rhythm & Art”, kaba dei ka kot kaba buh jingthoh ïa ki jingshad kolshor jong ka jylla Meghalaya. Kane ka kot ka dei ka jingthmu jong ka Sankardev College, Shillong ha ryngkat ka jingïatreilang bad ka tnad Arts & Culture bad la pyllait paidbah ruh sa kawei pat ka kot – “U Spor na Thwei Pyrkhat” da u Banjop Leo Gregory Kharmalki bad ka KOT (Khasi Old Testament) da u Raphael Warjri.
