Shillong, Naiwieng 21
U nongaiktien ka BJP ha Jylla, Bah M Kharkrang u la wohnia halor ki VIP bad ka jingïohlad jong kito kiba don ha ka bor ban long kham halor ïa kiwei haba leit jingleit bad u la dawa ban ieh ha ka jingtohkit ban sei ïa ki jingshisha halor ka jingkhlad u samla ha Ri-Bhoi District ha ka sngi ba pynlong ïa ka tamasa Cherry Blossom namar ka don ka jingkynnoh ba ka thuk-thuk ka shah tynrah ha ka kali pulit kaba synran ïa ki VIP.
U Bah Kharkrang uba long u IPS ophisar barim ka Jylla, u la ong ba ki don kiba pynpaw ba ka jingjia ka dei namar ka jingtynrah ka kali kaba synran ïa ki heh ki haiñ, hynrei u Myntri Sorkar u pynpaw da kumwei pat.
Kumta u la ong ba dei ban ieh beit ha ka jingtohkit ban sei ïa ki jingshisha baroh tad haduh ba ka jingtohkit ka lap eiei, ka kloi eh ban shu pynkut mano ba donkti ban leh bakla.
U Bah Kharkrang u la ong ruh ba lada kren kyllum shaphang ki heh ki haiñ (VIP) ka long kaei-kaei ka bym pynsngewtynnad ïa kiba bun khamtam ha nongbah Shillong kaba la jur palat ka dheng kali.
U la ong ba ki paidbah ki sngewthuh ba ki Myntri Sorkar ki donkam ban don ki kali pulit ban synran ïa ki haba leit jingleit ba kin poi sha ki jaka ba ki leit hynrei kaei kaba kham pyndiaw bad ka bym ïahap ka dei ba ki don kiwei pat ki briew kiba don jingïadei bad ki heh ki haiñ kiba don ha ka bor kiba ïoh lang ka lad ban pyndonkam kaba long kaei-kaei ka bym ïahap. Ki pulit ki dei ban ïoh laitluid ban trei la ka kam ban leh eiei ïa kito ki bym don hok ban pyndonkam ïa ka kyrdan VIP.
Shuh shuh u la ong ba ha Shillong ki paidbah ki la ïohi ïa ka jinglong jingman jong ka dheng kali bad haba ïaid ki heh ki haiñ ryngkat bad ki kali pulit ban synran ka long ka jingbuh jingeh noh ïa kiwei pat. Kumta ka dei ban don ka jingsngewthuh ha iwei pa iwei khlem da kheiñ ïa ka bor ne kyrdan ba ki don.
