Shillong, Risaw 27
U Nongïalam ka NPP bad ruh Myntri ka Sorkar Bah Wailadmiki Shylla ha ka sngi Ba-ar u la ong ba ka party ka la kyndit ïa ka rai jong u President barim ka NPP Megha-laya u Dr. Wanweiroy Kharlukhi ban kyrshan ïa u kyrtong ka Congress Bah Vincent H Pala ha ka ilekshon MP shiteng samoi ka ban sa long, hynrei u la ong pat ba ka dang long kloi pat ban ong ba kan ktah ïa ka NPP.
“U Dr. Kharlukhi u la dei u nongïalam ba la rangbah jong ka party, u la don bad ka party la slem kata naduh ka por jong u P.A Sangma (bam kwai ha dwar U Blei). Ym shym la poi pyrkhat ba kane ka la pynkyndit ïa ngi, hynrei ïa mynta ngam don ha ka kyrdan ban kynthoh la kane ka ktah ïa ngi. Ngi hap ban ap bad peit shwa,” la ong u Bah Wailadmiki.
Haba kynthoh ïa ka jingkam jong u Dr. Kharlukhi ba u la leit ban ai jingkyrshan namar ka mat FCRA, u Bah Wailad u la ong ba ka NPP na ka por sha ka por ka la rah ban ïakren ïa kane ka mat bad ka Sorkar Pdeng.
“U Myntri Rangbah jong ngi u la ïalam ïa ka kynhun bad nga ai khublei ïa ka Sorkar Pdeng ba halor ki jingkyrpad ki jong ngi, ki la pdiang ïa u dkhot Rajya Sabha ba thymmai jong ngi ban long u dkhot hapoh ka FCRA committee. Naduh ka sngi kaba nyngkong, ngi la kren ïa kane ka mat bad haduh mynta ngi dang don ha ka jingïakren bad ka Sorkar Pdeng,” u la ong.
U la pynpaw ruh ba u Dr. Kharlukhi u la pynshai ba u la kyrshan ïa u Bah Pala kum u kyrtong, ym ïa ka Congress.
“Ha Meghalaya, ki paidbah ki ju phai khmat bad kyrshan ïa ki kyrtong, ym ïa ka seng saiñpyrthei. Haba phai ha ka ilekshon MP ki la kyrshan ïa uwei u kyrtong, ha ka MLA ïa uwei bad kumjuh ruh ha ka MDC ïa uwei. Kumta na ka bynta jong nga ban kynthoh eiei mynta ka dang long kloi palat,” u la ong.
Halor ki jingïalap ilekshon jong u kyrtong ka NPP u Dr. D.R.L Nonglait, u Bah Wailad u la ong ba ka jingkyrshan na ki paidbah ha madan ka long shisha kaba ai mynsiem.
“Haman la ki jaka ba u kyrtong jong ngi u leit ïalap, dang ha ka taïew ba la dep ha Jowai, phi la ïohi ïa ka jingtuid jong u paidbah watla ka dei ka aïom ot kba. Wat mynta ka sngi ha Umroi, ka jingwan u paidbah ka long kaba heh. Ngi la nangïoh ka jingkyrshan na kawei ka sngi sha kawei pat,” u la ong.
