Shillong, Risaw 27
Uwei u samla na Bhoirymbong, Ri Bhoi district u Amunick Shadap uba bat kum u Vice President ka Ri Bhoi Youth Federation Bhoirymbong circle ryngkat ki dkhot un leit shaw ïa kawei ka longkmie na Tripura kaba la khlad ha Bangladesh.
Kane ka longkmie kaba pang jur ka la khlad hadien ba ka liengsuiñ kit nongpang ka la hiar kyrkieh ha nongbah Dhaka ha ka 18 tarik mynta u bnai Risaw 2026.
Kane ka liengsuiñ kit nongpang kaba tip kum ka ‘air ambulance’ jong ka Airports Authority of India (AAI) kaba don ha Maharaja Bir Bikram (MBB) Tripura, kaba kit ïa ka longkmie ka la khlad noh hadien ba ka ‘air ambulance’ kaba kit ïa ka na ka nongbah jong ka Tripura sha Kolkata, ka la hiar kyrkieh ha ka kad liengsuiñ jong ka Dhaka, hadien ba la pyntip ba ka la don jingthut ha ka liengsuiñ.
La pynkynriah ïa katei ka ‘air ambulance’ sha Hazrat Shahjalal International Airport ha ka nongbah Bangladesh ha ka Sngi U Blei, 18 tarik u Risaw bad katei ka liengsuiñ, ka la hiar suk bad hadien kata, la pynkynriah noh ïa ka Anjana Bhowmik, sha Kurmitola General Hospital, ha kaba la ïathuh ba ki doktor, ki la pynbna ba ka la khlad noh.
Ka Bhowmik, ka dei kaba sah ha Birubari ha Guwahati, kaba la don ka jingshitom ban ring mynsiem bad la phah ïa ka sha Kolkata na ILS Hospital ha Agartala, na ka bynta ban ïoh ïa ka jingsumar kaba kham bha, ong ka khubor na kad liengsuiñ.
Ïa kane ka liengsuiñ kit nongpang la pynbeit da ka AAI ban kit ïa ka sha Kolkata haba ka jingeh ba la ïathuh ba ka la pynbor ïa ki nongñiah liengsuiñ ban pynkylla lynti ïa ka liengsuiñ sha Dhaka.
Ki jingjia kiba thikna kiba ïadei bad ka jingïap jong ka, ym pat lah ban lap ïa ka daw jong ka jingïap kaba thikna.
Haba ïoh ban ïakren bad u samla Amunick Shadap u la ïathuh hadien ba katei ka liengsuiñ kit nongpang ka la hiar sha Dhaka, ki pulit Bangladesh ki la wan bat ïa ki namar ba kim don ka passport haba ki poi sha Bangladesh kane ka la pynkhuslai ïa ki bahaïing namar kim lah ban wan kit ïa ka metïap sha India hynrei hadien shi taïew ba la ïakren pynbeit baroh ar tylli ki ri ka Bangladesh ka la shah ban Kot noh sha India.
U la ïathuh haba ka metïap kan poi sha India lashai ka sngi ka 28 tarik Risaw yn hap ïaid lyngba ka Dawki kumta ki bor pynïaid liengsuiñ ba don ha Umroi, ka la wad kali kit nongpang bad la ai sngewbha da ka Seng RBYF bad la aiti ha u ban leit ñiah ban leit sahmiet lypa mynta ka miet sha Dawki.
U samla Amunick u la ïathuh ba u la mih na Bhoirymbong ha por 8:00 baje mynmiet ban leit sahmiet lypa ha Dawki ban sa leit shaw ïa ka metïap bad ki bahaïing kiba sahkut ha Bangladesh ban leit buh beit beit sha Guwahati.
