Shillong, Risaw 27
Ka Khasi Hills Autono-mous District Council (KHADC) hapoh ka jingïalam u Chief Executive Member (CEM) u Bah Winston Tony Lyng-doh ha ka sngi Ba-ar, ka la leit khang ïa ka jaka ba pyntrei ïa ka Projek Shillong Ropeway kaba don ha Madan Laban.
Ha kane ka jingleit khynra, la sakhi ba u CEM bad ki pulit Enforcement ka KHADC ki la pynshai ïa ka jingwan khang tala ïa ka Projek ha Madan Laban, da kaba kdew ba ka kompeni, ba pyntrei ïa kane ka Projek kam pat ïoh Trading License na ka District Council.
Haba kren sha ki lad pathai khubor u CEM ka KHADC u Bah Winston Tony Lyngdoh u la ong ba ka District Council ka la dep phah da ka ‘Show Cause Notice’ sha kane ka kompeni ba pyntrei ïa ka Projek Shillong Ropeway, ba kan jubab hapoh 7 sngi hynrei kane ka kompeni kam shym la jubab satia.
U Bah Winston u la ong ba ka kompeni kam shym la shimkhia ïa ka ‘Show Cause Notice’ ba la phah da ka District Council ban pynbiang ïa ka Trading Licence ban ïoh sdang ïa ki kam jong ka Shillong Ropeway Project.
“Ngi la phah ‘Show Cause Notice’ naduh u bnai Jymmang, Nailur hynrei ka kompeni ba pyntrei ïa kane ka Projek kam shym la shimkhia ban pynbiang ïa ki jingdonkam ban ïoh Trading License, namarkata ngi la khang tala noh ïa kane ka jaka bad ngi la aipor 7-10 sngi ïa ka kompeni ban pynbiang shuwa ïa ki kot sla” la ong u Bah Winston.
U CEM u la ong ba ka District Council kan ai por ïa ka kompeni ban pynbiang ïa ki kot ki sla, bad katba ka kompeni kam pat pynbiang ïa ki kot ki sla, kane ka jaka ba pyntrei ïa ka Projek Shillong Ropeway, kan dang shah khang tala.
