Shillong, Risaw 27
Ka Kynhun Myntri ka Jylla ha ka Sngi Ba-ar ka la mynjur ban thied sa kiwei pat ki jaka pynthor kba ki ban don hapoh ka ‘Knowledge City’ (kaba la tyrwa) ha Mawkhanu, New Shillong ha ka jinglut kaba T.13.78 klur.
Kane ka jingmynjur ka la long ha ka jingïalang jong ka Kynhun Myntri ba la pynïaid da u Myntri Rangbah ka Jylla, u Conrad K. Sangma.
U nongaiktien ka MDA bad Myntri Sorkar, Bah Wailadmiki Shylla u la ong ba kitei ki jaka ki dei ki lynter jaka kiba rit kiba don hapdeng ka jaka kaba heh kaba la dep ban shim lypa da ka Sorkar.
“Kumba baroh phi ïa tip, ngi la thied ïa ka jaka kaba heh ha ka thaiñ Mawkhanu, hynrei ki don katto-katne ki lynter jaka rep kba kiba wan lang hapdeng. Ïa kane la ju ïakren ruh ha ki por ba la leit noh,” la ong u Bah Wailad.
U la ong ba ki jaka ba la saphriang kin pynthut ïa ka jingpyndonkam hok ïa ka jaka jong ka ‘Knowledge City’.
“Namarba kan long kumba wan hapdeng, kan ktah shi kat dei ïa ka jingpyndonkam ïa ka jaka, kumta mynta ka sngi, ka Kynhun Myntri ka la rai ban thied ïa kane ka lyngkhot jaka,” u la bynrap.
U Bah Wailad u la ïathuh ba ka jingheh baroh kawei ka long 2,81,000 ‘square feet’ bad ka dor ka long T.490 shi ‘square feet’, kumjuh kumba thied hashuwa.
“Ka pisa baroh ka poi sha ka T. 13.78 klur,” u la ong.
