Shillong, Naiwieng 24
Ha ka miet jong ka 23 Naiwieng 2024 bad baroh shi miet, ki nongdie madan na kylleng ki shnong bad ki jaka jong ka nongbah Shillong ki la ïalum lang ban synran ïa ki para nongdie madan ha Khyndailad kiba khlem khang shuh ïa ka jingdie mar jong ki, kum ka dak bad ka jingïakhih ban pyrshah jur ïa ka jingpyndik, jingpyntieng jingpynsmiej jong ki bor Sorkar kiba ïai byrngem ban weng beaiñ bad kyndang jubor ïa ki.
Ha ka kyrwoh khubor kaba la pyllait da ki nongdie madan, la ong ba ki nongdie madan ha Khyndailad ha ka ryngkat ka jingsynran lang ki para nongdie madan na kylleng ki khlem khang shuh ïa ki jingdie mar jong ki baroh shi miet ha ka miet 23 tarik kum ka dak ban pyrshah jur ïa ka jingkren thaw nang bad jingïalam bakla jong u Bah Paul Lyngdoh, Myntri ka Sorkar Jylla uba byrngem ban weng bad kyndang beaiñ ïa baroh ki nongdie madan ka ban sdang naduh ka 24 tarik Naiwieng, 2024.
La ong ba hapdeng ka jingkhriat tasam jong ka miet tlang, ki nongdie madan ha Khyndailad ki la shong sah miet ha ki jaka die jingdie jong ki ban ïeng ïakhun ïa ka hok kamai jong ki bad ban ïada ïa ka aiñ kaba ïada bad kyntiew ïa ka kamai jakpoh jong ki. Ki nongdie madan ki ïeng ban ïakhun na ka bynta ki khun ki kti ban bsa bad pynnang pynstad ïa ki.
U Shane Thabah uba dei u General Secretary jong ka MGSPHSVA, ka seng ki nongdie madan u la ong ba kane ka jingsah miet jong ki ha ki jaka ba ki shong die jingdie ka dei ka jingïakhih kaba don burom tam. Ka dei ka jingïakhih ka ban pynkynmaw ïa ka Sorkar ba ka dei ban pyntreikam hok bad ïa iwei pa iwei i kyndon jong ka aiñ, The Street Vendors ( Protection of Livelihood and Regulation of Street Vending) Act 2014 kaba dei ka aiñ kaba ïada bad kyntiew ïa ka kamai jakpoh jong ki Nongdie madan.
Ka Seng ki Nongdie madan ka pyntip ruh ba kino-kino ki jingtei ne ïing shong dukan kiba thymmai kiba tei da ka Sorkar, kum ka Shopping Mall ha MTC, Mariot Hotel, Vivanta Hotel, Polo Market, Laitumkhrah Shopping Complex dei ban mang kyrpang kumba 20% ki kamra dukan na ka bynta ki Nongdie madan ba kin lah ban die jingdie.
Shuh shuh ki don beit ki jaka ha kaba ki nongrwai nongput nongtem ki lah ban pyni ïa ki sap jong ki bad ban pynbyrngia ïa ki briew, ka Seng ki Nongdie madan bad ki Nongdie madan ki pdiang sngewbha ïa ki ba kin wan ban tem sur bad kynud jingrwai ha ki jaka ba ki shong die jingdie. Wat u Bah Paul Lyngdoh ruh lada u kwah ban rwai ne pule ïa ki poitri jong u, ma ngi ki Nongdie madan ngi kloi ban ïarap ban pynkhreh bad pynlong ïa ki tamasa ba kyrpang na ka bynta jong u ha madan.
