Shillong, Naiwieng 24
Uwei u samla u la duh noh ïa la ka jingim hadien ba u la ngat ha ka jingïatakhuh kali kaba la jia ha ka Sngi U Blei ha ka surokbah ha shnong Mawsawa ha Eastern West Khasi Hills.
Katkum ka tyllong khubor kaba la ïoh lum la ong ba ha ka Sngi U Blei hapdeng 2.30 haduh 2.40 eiei nohphai sngi, ka la don ka jingïatakhuh kali hapdeng kawei ka arshaka kaba don ïa u registration number ML10-B-0738 bad kawei ka kali Baleno kaba don ïa u registration number ML05-AC-3538 kaba la jia ha surokbah NH-44(E).
La ong ba ha kane ka jingïatakhuh kali, u samla uba la ñiah ïa ka ar shaka u la khlad noh hashen. Katkum ki dur, la ïoh ba ka arshaka bad katei ka kali, ki la julor na ki bynta ba shakhmat, kaba lah ban dei ba imat ki la ïatakhuh mar pyrshah.
Katkum ka jingïathuh uwei na ki paralok jong utei uba la khlad, la ong ba ki la ïa mih na ka jaka bylla ha Shillong ban leit phai sha la shnong bad ong ba ynda la poi ha Mairang, utei u samla shwa ba un ngat ha katei ka apot, u la mih ban leit buh ïa uwei pat u paralok sha Kynshi.
Une u paralok u la ïathuh ba haba u la shim por ban wan phai, u la pyrshang ban phone, hynrei ym ïoh bad hadien katto-katne, sa ïoh khubor ba ka don ka jingjia ïatakhuh kali bad dei tad ynda u ïohi ïa ka dur jong katei ka arshaka ba un sa lah ban tip ba u dei u paralok jong u, bad mar mar u la hiar sha katei ka jaka.
