Shillong, Nailar 13
U Myntri Rangbah ka Jylla, u Conrad K. Sangma ha ka Sngi Palei u la ong ba ka Sorkar Meghalaya ka la rai ban thaw ïa ka ‘FCRA Cell’ hapoh ka tnad kam pohïing na ka bynta ban ïarap ïa ki kynhun seng hapoh ka Jylla halor ki aplikeshon bad ki jingpynthymmai haba ïadei bad ka Foreign Contribution Regulation Act (FCRA).
Haba kren sha ki lad pathai khubor, u Myntri Rangbah u la ong ba ïa kane ka ‘Cell’ yn sa thaw ha ryngkat ka jingïasyllok bad ka Sorkar India bad ka jingthmu ka long ban weng ïa ki jingeh hapoh ka thaiñ ha ka jaka ban pynbor ïa ki kynhun seng ban leit shaduh sha Delhi.
“Nga kwah ban pyntip sha phi ba ka Sorkar Meghalaya ka la rai ba ngin thaw ïa ka ‘FCRA Cell’ hapoh ka tnad kam pohïing jong ka Sorkar Meghalaya. Ïa kane hooid yn sa leh ha ryngkat ka jingïasyllok bad ka Sorkar India,” la ong u Conrad.
U la ong ba ka jingthmu jong kane ka ‘Cell’ ka long ban ïatreilang bad ka Sorkar Pdeng bad ban pynbeit ïa ki jingeh kiba ki seng bapher-bapher ki ïakynduh.
“Ka jingthmu jong kane ka ‘Cell’ ka long ban ïarap ha ka jingïatreilang bad ka Sorkar Pdeng ban wad ïa ki lad ki lynti kiba treikam haba phai sha ki jingeh bapher-bapher kiba ki kynhun seng bapher-bapher jong ngi ki ïakynduh haba ïadei bad ki jingpynthymmai ïa ki aplikeshon – khnang ban lah pynbeit hi hangne ha Shillong ne ha Tura ne ha Jowai khlem da donkam ban leit sha ki jaka kum sha Delhi,” u la ong.
U Conrad u la bynrap ba ïa kane ka kam la dep ban ïakren bad u Secretary ka tnad kam pohïing ka Sorkar Pdeng bad ba ka rukom treikam kaba la pyntrei kan kynthup ruh ïa ki ophisar ka Sorkar India ban ai jingkyrshan na ka por sha ka por.
“Ka paw shai ba ha kane ka jingïatreilang, ngi kyrpad ïa ka jingkyrshan jong ka Sorkar India bad ngan ïathuh ha phi khlem da ai ïa ki jingtip kiba bniah – ïa kane ka kam la ïakren ruh bad u Secretary ka tnad kam pohïing bad ngi dang trei ha ka rukom ha kaba ki ophisar ka Sorkar India ruh kin don lang ban kyrshan na ka por sha ka por khnang ban pyntikna ba kino-kino ki jingeh kiba don hangta, yn sa peit bniah ïa ki,” u la ong.
U Myntri Rangbah u la ban jur ba ka Sorkar Jylla kan shim ïa ka sienjam ban buh ïa katei ka ‘Cell’, bad lah ruh ban plie ïa kane ha ki jaka bapher-bapher lada donkam.
“Ka Sorkar Meghalaya kan shim ïa ki sienjam ban thaw ïa kata ka ‘FCRA Cell’ hapoh ka tnad kam pohïing ha ka Sorkar Jylla ha ki jaka bapher-bapher lada donkam, ban ïarap bad kyrshan ïa ki kynhun seng bapher-bapher ha ka rukom treikam jong ki – ban aplai ne pynthymmai ïa ki laisen FCRA (jong ki),” u la ong.
U Conrad u la khot la wer ruh ïa ki seng saiñ pyrthei ban buh shuwa sharud ïa ka politik haba phai kane ka mat, da kaba ong ba ka jingthmu ba kongsan ka long ban pynïa biang lang ïa ki kyndon bad ki jingdonkam jong ki shlem treikam kiba trei na ka bynta ki baduk-basuk.
“Kumba nga la ong, kan long kaba bha lada baroh ki seng saiñ pyrthei kin buh shuwa sharud ïa ka politik, bad ban peit shisha kumno ngi lah ban synñiang ban pyntikna ba ka jingmih kaba bha kan wan; kam dei shaphang ka jingkwah burom, kam dei shaphang ka jingong ba nga leh ma nga, phim shym la leh ma phi, ban ïa kynnoh iwei-ïa-iwei ne ïano-ïano. Nga pyrkhat ba ki don shibun kiei-kiei. Nga sngew ba kane kam dei ka por ban leh politik, hynrei ka por ban ïatreilang,” u la ong.
Shuh shuh u la kdew ba watla ka jingpeitngor bad jingpynbeit ryntih ïa ka pisa bar-ri ka dei ka rukom treikam kaba la buh ryntih, hynrei ka Jylla ka dei ban pyntikna ba ki seng trai-ri kin ym shah ktah palat.
“Kane kam dei ka por ban ïaleh politik hynrei ka dei ka por ban ïatreilang, ban pyntikna ba ngi lah ban wad ïa ka lad ha kaba ki katto-katne ki jingsngewkhia jong ka Sorkar India ki don, haba ïadei bad ka jingpeitngor kumjuh ka jingpynbeit ïa ka pisa bar-ri, kaba dei ka rukom treikam kaba ju leh ha kylleng ka pyrthei hynrei katba ki rukom treikam ban peitngor bad pynbeit ryntih ïa ka pisa bar-ri ki nang ïaid, ki briew jong ngi kim dei ban mad jingeh, jingtynjuh ne wat ka jingshah knieh noh ki jingdon-jingem jong ki. Kumta ban pynïabiang lang hapdeng kine ki ar tylli ki jingdonkam, ka dei shisha ka jingdonkam jong ka por bad kata ka dei kaei kaba ngi leh mynta – ban wad ïa ka lad treikam ka ban pynbeit hynrei ban ym pynthut ne ktah ne pynsniew pat ïa ki shlem treikam jong ngi bad ki kynhun seng (jong ngi) kiba don hangne ban ïarap bad trei na ka bynta ki briew kiba duk ba duna jong ka Jylla jong ngi,” ong u Conrad.
